Tysklandimi atuarfik matuneqarpoq

Sioorasaarutit atuarfimmut Kaarst-imiittumut Düsseldorfip eqqaaniittumut sammitinneqarput. Finlandimit mianersoqqusisoqareersorlu politiit atuarfiup matuneqarnissaa aalajangiuppaat.

Finlandimi politiit mianersoqqussummik nassiussaqarput, tassa internetikkut attaveqaqatigiittarfimmi sioorasaarisoqareersorlu. Attaveqaqatigiittarfik taanna Finlandimi sapaatip akunnerisa marluk matuma siornagut atuarfimmi toqoraasoqareersorlu politiinit nakkutigineqalerpoq. Inuit marluk internetimi oqaatigaat Kaarst-imi atuarfimmi eqqaassisoqarnissaanik pilersaaruteqartoqartoq tusarsimagitsik.

- Mianersoqqussut erseqqarluttorujussuuvoq, kisianni isiginngitsuusaarsinnaanngilarput, tassami atuartut isumannaatsuunissaat pingaarnerpaavoq, politiit oqaaseqartitaat Ralf Kamphausen oqarpoq.

Tallimanngormat inuusuttut marluk sakkulersorsimaqalutik Köln-imi atuarfimmut eqqaassiartorniarlutik pilersaaruteqarnerat paasineqarpoq.

Atuarfik aamma taanna matuneqarpoq. Pasineqartut taakku aappaa politiinit killisiorneqareerluni imminut toquppoq, aappaalu ippassaq politiinit iperagaatinneqarpoq, tassa inuusuttut taakku marluk pilersaarutertik qaammatip ataatsip siornagulli taamaatiinnarsimagaat paasineqarmat.