Tyskland bronzinnappoq

Arsaalluni Sydafrikami World Cupertoqarnerani bronzinnanniunneq pissanganarluinnaqqissaartumik ingerlanneqarpoq.
juulip 10-at 2010 17:04

Tyskit uruguayeimiunut ajugaanissaat eqquniaasitsisartut siulittuutigereerpaat. Tyskeq Thomas Müller siulliulluni ajuuppoq. Uruguayimiu Edison Cavani ajuutereersorlu arsaattut tamarmik ataaseraaqqallutik unikkallarput.

Arsaannerup immikkoortuata aappaa aallarteqqammiinnartoq Uruguay siuarpoq, Diego Forlan isertitsimmat.

Tyskland akiuulluaqaaq. Marcell Jansen siulliulluni isertitsivoq, kinguninnguagullu Sami Khedira aamma isertitsilluni.

Tassalu unamminerup inernera taama isikkoqarpoq, Tyskland pingasoraarpoq, akerai marloraartut, tyskillu tassa bronzinnapput.