Tyskland: 26-nik ukiullip angajoqqaani ilaquttanilu allat sisamat toqukkai

Tysklandimi nunap immikkoortuani Baden-Württembergimi illoqarfeeqqami Rot Am Seemi aallaasersortoqarmat inuit arfinillit toqutaasimasut, Rot Am Seemi politiit uppernarsarpaat.
Rot Am Seep qiterpasissuani Bahnhofstrassemi aallaasersortoqarpoq. Bahnhofstrassemi najugallit politiinik kalerriipput, politeerpassuillu kingorna ornigullutik. Assi © : Marijan Murat/AFP/Ritzau Scanpix
Allattoq Ritzau
januaarip 24-at 2020 16:53
Nutserisoq Mads Lynge

Toqutaasut aallaasersortup 26-nik ukiullip ilaqutarigai, politiit, tusagassiortunik ualeq manna katersortitsinermi ilisimatitsissutigaat.

Angutit pingasut arnallu pingasut, 36-t 69-illu akornnni ukiullit, toqutaapput, taakkunannga 26-nik ukiullip angajoqqaavi.

Toqutsinermut pissutaasut politiit suli ilisimaneqanngillat, aallaasersortorlu 26-nik ukiulik politiinit kingorna tigusarineqarmat, aallaasersortoq nassuiaateqarusussimanngilaq.

Rot Am Seep qiterpasissuani Bahnhofstrassemi aallaasersortoqarpoq. Bahnhofstrassemi najugallit politiinik kalerriipput, politeerpassuillu kingorna ornigullutik.

Angut saassussisoq aallaasimik eqittaannartakkamik peqarsinnaanissamut akuersissuteqarsimavoq, aallaaserlu taamaattoq saassussinermu atorsimallugu.

Toqutaasut arfinillit saniatigut allat marluk ikilerneqarput, ikilernertut aappaata inuunera navianartorsiorluni.

Illoqarfeeraq Rot Am See Nürnbergimit kimmut 100 kilometerit missaanni ungasitsigisumiippoq, 5000-illu missaannik innuttaqarluni.