Tyskit ullumikkut quarsaaqqasorujussuupput
Tyskit ullumikkut quarsaaqqasorujussuupput, tassa naalagaaffiup immikkoortuini Slesvig-Holstenimi aamma Sachsenimi anaanat marluk meeqqaminnik katillugit arfineq pingasuusunik toqutsisimanerarlugit ippassaq pasineqalermata. Meeqqat timaat ullumikkut misissuiffigineqassapput, taamaaliornikkut suna toqqutigisimaneraat paasineqassasoq neriuutigineqarmat.
Tysklandip Avannaani illoqarfeeqqami nunaannarmiittumi ilaqutariit illuanni politiit nukappiaqqat tallimat, pingasuniit qulingiluanik ukiullit timaat ippassaq nassaaraat. Nukappiaqqat arnaat 31-nik ukiulik, eqqarsartaatsimigut napparsimasuusoq, meeqqanik toqoraasimasutut pasineqartoq politiinit ilisimatitsissutigineqarpoq, tamannalu pivoq anaanaasup illoqarfimmut tassunga nuunneranit qaammatit pingasut qaangiutiinnartut.
Anaanaasoq nakorsaminut nassuermat, nakorsaata politiinut nalunaarutigaa.
Meeqqanik toqutsisarneq naalliutsitsisarnerlu piffissami kingullermi Tysklandimi naalakkersuinikkut iliuuseqarfigineqaqqullugu oqallisaasorujussuuvoq. Politikerillu inatsisinut tunngasut sukateriffigerusuppaat, soorlu assersuutigalugu meeqqat nakorsamit misissorneqartarnissaannik angajoqqaat pisussaaffilernerisigut.
Tysklandimi Kangilliusimasumi illoqarfimmi Plauen-imi arnaq 28-nik ukiulik ippassaq aamma tigummineqarallartussanngortinneqarpoq. Taanna meerartaaminik pingasunik 2002-mi, 2004-mi aamma 2005-imi inunngoriitsiartullu toqutsisarsimasutut, panissaamilu timaannik toqqorterisimasutut pasineqarpoq.
