Tyskit puisit amiinik eqqusseqqusiunnaariaannaapput

Ukiuni arlalinni paasisitsiniaaneq ilaatigullu nunanik EU-mut ilaasortaasunik ataatsimeeqateqartarnerit asuliinnarsinnaapput.

- Massakkut Tysklandip puisit amiinik nunatsinneersunik eqqusseqqusiunnaarniarnera ajornartorsiutaavoq. Tamannalu takussutissaalluarpoq pissutsit piviusut aallaaviginagit misigissutsilli aallaavigalugit pusit amii pillugit oqallittoqarmat, aalisarnermut, piniarnermut nunalerinermullu naalakkersuisoqarfimmi pisortaq Amalie Jessen oqarpoq.

Puisit amiinik Tysklandimut eqqusseqqusiunnaarneq nunatsinni piniartunut qanoq sunniuteqarsinnaanersoq apeqqutigineqarmat Amalie Jessen ima akivoq.

- Soorlu 70-ikkunni 80-ikkunnilu takoriikkatsitut taamatut iliuuseqarneq annertoorujussuarmik kinguneqartarpoq. Tamanna puisit amiisa akiinut sunniuteqaannarani atugarisanut sunniuteqartarpoq.

Tamanna uteqqilerpoq, piniartullu avinngarusimasuniittut eqqorneqassapput.

Ukiuni kingullerni ataatsimeeqateqarnerit paasisitsiniaanerillu ingerlanneqartarput, immaqa tikeraartitsinissarput tullinnguuttariaqarparput.

Aalajangersaaniarnermi uumasunik illersuiniaqatigiit tusaaniarneqartorujussuusarput. Pissutsit piviusut, soorlu puisit amerlassusaannut tunngasut pineqaratik misigissutsinut tunngasut isiginiarneqarnerusarput. Aamma uumasunik illersuiniaqatigiit aningaasaatilerujussuupput nukittoorujussuullutillu, uagut taakkununnga naleqqiulluta toorneerannguusugut oqartoqarsinnaavoq.

Aalisarnermut, piniarnermut nunalerinermullu naalakkersuisoqarfimmi pisortaq Amalie Jessen taama oqarpoq.