Inuit 6 millionit missaat Oktoberfestimi ukiut tamaasa peqataasarput, toqqit angisuut inunnik tuusintilikkaanik katersuuffiusinnaasut napparneqartarput, Bayernimi immiaaqqat liiterikkuutaarlugit ilaatigut imerneqartarlutik.Assi: Christof Stache/AFP/Ritzau Scanpix

Tyskit ministerpræsidentiata Oktoberfest taamaatiinnaraa

Bayernimi oqartussat oqarnerat naapertorlugu Oktoberfest pilersaarutigineqartutut ukiaru aaqqissuunneqassagaluarpat aarlerinartoqarpallaarpoq.

Tyskit inuiattut ukiumoortumik nuannattarnerat Oktoberfestimik taaneqartartoq, coronavirus pissutigalugu ukioq manna taamaatiinnarneqarpoq.

Nutaarsiassaqartitsivik dpa naapertorlugu Tysklandimi nunap immikkoortuata Bayernip ministerpræsidentiata Markus Söderip tamanna ullumi nalunaarutigaa.

Oktoberfest pilersaarutigineqartutut aaqqissuunneqassagaluarpat aarlerinartoqarpallaartoq oqaatigineqarpoq. Festivali pineqartoq immiaaqqanik nunarsuarmi sassaalliiffiusuni annerpaavoq.

Oktoberfestertoqarnissaa navianarpallaartoq

Oktoberfest septembarip ulluisa 19-iannit oktobarip ulluisa sisamaata tungaanut pisussatut aaqqissuussaagaluarpoq. Inuit nunanit allaneersut 2 millionit missaat Oktoberfestimi ukiut tamaasa peqataasarput.

Oktoberfestertoqarnissaali navianarpallaartutut nalilerneqarpoq, coronavirusimummi akiuussutissaqartinnagu taama aaqqissuussisoqarnissaa aarlerinartortaqarpallaartutut nalilerneqarpoq. Markus Söder taama oqarpoq.

- Uggornaqaaq, ajuusaarnaqaaq, taanna Oktoberfestip taamaatiinnarneqarneranut atatillugu tusagassiortunik katersortitsinermi oqarpoq.

Inuit 6 millionit missaat Oktoberfestimi ukiut tamaasa peqataasarput, toqqit angisuut inunnik tuusintilikkaanik katersuuffiusinnaasut napparneqartarput, Bayernimi immiaaqqat liiterikkuutaarlugit ilaatigut imerneqartarlutik.

Tamannali ukioq manna tassa taamaatiinnarneqarpoq.

Isummersuutit