Tyskit Minik arsartorerusuppaat
Minik Dahl Høegh klubbip Rhein-Neckar Löweninip pisiarerusullugu aningaasanik neqerooruteqaraluarpoq, saamerliulluni arsaattartup, arsartuni pingaaruteqaqisup, serbiamiup, Zarko Sesumip, Europami pissartanngorniunnerup nalaani isimigut milortilluni ajoqusertup, taartissaatut piukkullugu.
Minik Dahl Høeghilli arsallaqqeqisup klubiata HC Fynip tamanna ajoriffissaqartinngikkaluaraa, attartornissamut isumaqatigiissut piviusunngunngitsoorpoq. Minik Dahl Høeghimi Danmarkimi 1. divisionimi qaammammi uani unammeqataasimanini pissutigalugu Europami EHF Cup-imi tyskit sinnerlugit, Bundesligami taamaallaat unammisinnaassalluni.
Tamanna Rhein-Neckar Löwenimut ajornartorsiutaavoq, ukiummi ilaani matumani Europami klubbinut allanut unammisarnissaq upernaaq manna sukataarfiginiaramikku.
Bundesligamummi siunissami ilanngussinnaanissani Minik Dahl Høeghip pilerigeqaa.
- 1. divisionimit annerusumik angusaqarusuppunga. Bundesligamiilernissara angorusuppara, Minik Dahl Høegh SportFynimut oqarpoq.