Tyskit arsaattartuini 23-usuni aqqanillit Tysklandip avataani allamiunilluunniit kingoqqillutik Tysklandimi inunngorsimasuupput.
- Tysklandimi ilanngutsitsiniarneq iluatsilluarsimavoq tamannalu namminerluunniit suli iluamik paasisimanngilarput, Klaus Bade professoriusoq ilanngutsitsinermillu immikkut ilisimasalik oqarpoq.
Kanslerip, Angela Merkel-ip, arsaattartutik nunanit tamalaaneersut Tysklandimi ilanngutsitsilluarsimanermut takussutissaanerarpai.
Naak ilanngutsitsilluarsimaneq arlalitsigut takussutissaqarlualereeraluartoq taamaattoq Tysklandimi suli annertuunik ajornartorsiuteqarpoq - pingaartumik nunasisut ilinniagakinnerat pissakitsullu nunasisuunerusut suli amerliartornerat pillugit.
Inuusuttut pikkorissut Tyrkiamit, Nigeriamit, Polen-imit, Ghana-mit, Brasiliamit, Spaniamit, Tunesiamit aamma Bosnien-Hercegovinamit aggersut Sydafrikami arsaalluni pissartanngorniunnermi takutitsilluartut allamiunit kingoqqisuugaluarlutik nunagilikkaminni nuannaartitsisinnaanerat Klaus Badep takutitsilluarnerunerarpaa.
Ualeru nalunaaqutaq tallimanut qiteqquppat, tassa nal. 16.30, VM-imi semifinalet aappaat KNR-TV-kkut takutinneqalerpat tyskit arsaattartui nunanit tamalaaneersut Spaniamiunut unammisut isiginnaarneqarsinnaapput. Unamminermi tassani ajugaasut sapaatiuppat pissartanngorniuutivittoqalerpat Hollandimut unammissapput.