Tyskit akuersinerulerput

IWC-mi Kalaallit arfattassinneqarnissaannut tyskit akerliusarnerat oqaluttuaannanngoriaannaavoq, Angela Merkelip neriorsuutigimmagu kalaallit napaniarnerminnut atatillugu pisassinneqartarnissaat siunissami aqqutissiorniarlugu.

Kingullermik Anchoragemi arfattassiissutissat pillugit ataatsimeersuartoqarnerani kalaallit pisassinneqarnissaannut tysket akerliusut ilagaat. Tamannali tyskit kansleriata Angela Merkelip Ilulissaneereernerata kingunerisaanik allanngorsinnaalerpoq.

- Nunap inuiisa piniakkanik atuinerat annertuumik paasisaqarfigalugu aallarput aammalu oqaatigaat annertuumik tassani tapersersuiniarlutik illersuiniarlutillu.

Hans Enoksenip erseqqissaatigaa tysket tapersersuinerat kalaallit inuuniarnermut iluaqutaasussamik taamaallaat arfanniarnissaamut atatillugu tapersersuinialersaartut, aningaasarsiutigaluguli avammut tuniniaanissaq siunertaralugu arfanniarnissamut suli akerliunertik tysket ataannassanerarpaat.

Kisiannili tunuliaquttamik tysklandimiittut paasitinniarnissaat aamma apeqqutaalluinnartoq Angela Merkelip erseqqissaatigisimavaa.

- Kalaallit Nunaannut tikeraarsitsinerit imatut ittut nunani allamiut isumaannik nikisitsisinnaasutut nalilerusuppakka, ingammik Kalaallit Nunaanni inuuniarnermi atugassarititaasullu aallaavigissagaanni, maani pinngortitaq sakkortuunik atugassaqartitsisarmat, Statsminister Anders Fogh Rasmussen oqarpoq.

Aamma erseqqissaatigaa taamatuttaaq puisit amiisa Tysklandimut eqqussuunneqartarnerisa killilersorniarneqarnerannik oqalunnerit tunulequtaasut nassuiaannerisigut nikisinnissaat aamma anguniarneqassasoq Angela Merkelimiit ataatsimiinnermi neriorsuutaasimammat.

Ataatsimeeqatatigiit avataaneersut ullumikkut tamarmik Ilulissaniit silagissorsuugaa aallaqqipput.