Tyrkiamut takornariat sioorasaarneqarput
Tyrkiami takornariaqarneq annertuumik eqqugaasussanngorunarpoq, Tyrkiami aniguisitsiniaqatigiit kurderiusut takornarianut saassussiniarlutik siorasaarimmata.
- Tyrkit takornariaqarnermit isertittagarpassuatik kurderinut saassussinissamut atortaraat, kurderit aniguisitsiniaqatigiiffiat TAK nalunaarpoq.
Tyrkiami hotellit nuannaariartarfiit takornarissanillu sullissiveqarfiit saassunneqassasut TAK aamma allappoq.
TAK Istanbulimi tallimanngormat qaartitsivoq, tassani inuk ataaseq toqutaavoq aqqanillillu ikiligaallutik.
TAK tassaavoq inuiaqatigiit kurderit Tyrkiap kujataata kangianiittut aniguisitsiniaqatigiiffiat 1984-imi aallarnerneqartoq. Taamanerniillu kurderit namminersulerumallutik akiuunneranni inuit 30.000-init amerlanerusut maannamut toqutaasimapput.
