Tyrkiamiut isorineqartut

Tyrkiami pissutsit pillugit missuinermit nalunaarusiaq ullumi saqqummiunneqarpat EU-p Tyrkiallu akornanni pissutsit suli ajornerulissangatinneqarput. Naalliutitsisarnerit, qinikkat sakkutuunik nakkutiginnissinnaannginnerat killilerujussuarmillu oqaaseqarsinnaatitaaneq nalunaarusiami Tyrkiamiunut arlalitsigut isorinnissutaapput.

Nalunaarusiaq sapaatip-akunnerata tulliani aatsaat saqqummiunneqartussaavoq taamaattorli Tysklandimi aviisit ilaanni tusagassiortup nalunaarusiaq atuareerlugu tusarliussivoq ilimagisamisut sakkortuumik isornartorsiusoqarsimasoq. Tyrkia EU-mi ilaasortanngussaguni arlalitsigut aaqqiisariaqartoq EU-mit tikkuartuiffigineqartarpoq.

- Tyrkiami naalliutitsisoqartanngitsuuppat killilimmillu oqaaseqartitsisoqartanngitsuuppat Tyrkiap EU-mi ilaasortanngornissaa neriunarnerussagaluarpoq, Tyrkiami atorfilittat ilaat kinaassutsiminik isertuussisoq tusagassiortumut nalunaarusiamik atuarsimasumut taama oqarpoq.

Tyrkiap tikkuartuiffigineqaatini aaqqinniarlugit iliuuseqarpiarsimanngitsoq EU-mit isumaqarfigineqarpoq. Taamaammat EU-mi nunat ilaasortanngorniarnerinik isumaqatiginniartartut siuttuat aqagu Tyrkiamiunik ataatsimeeqatiginnileruni isornartorsueqqissalluni ilimasuppoq.

Isumaqatigiinniarnerit aallartitsinnagit illuatungeriinnut attuumassuteqanngitsut illuatungeriinnik ataatsimeeqateqaqattaarput, isumaqatigiinniarnerit isasuunnginniassammata.