Tyrkiamiut inuiannik toqoraasimasutut taaneqarput
USA-mi inatsisartut nunanut allanut ataatsimiititaliaa ippassaq aalajangersakkamik akuersissuteqarpoq, aalajangersakkami tassani sorsunnersuarmi siullermi Tyrkiamiut Ameniamiunik toqoraanerat inuiannik toqoraanertut taaneqarpoq.
Tamanna sioqqullugu præsident George Buship aamma nunanut allanut ministerip Condoleezza Ricep aalajangersakkap akuersissutigineqarnissaa mianersoqqussutigigaluarpaat. Buship Tyrkia USA-mut ikinngutaalluartutut taavaa. Aalajangersagaq maanna USA-mi inatsisartut immikkoortuini marluusuni taasissutigineqartussanngorpoq.
1915-imi Armeniamiut kristumiut 1,5 millioniusut Tyrkiami toqorarneqarput, ilaatigut pisoruloortitaallutik kaatsitaallutillu.
Taamatut aalajangersaaneq Tyrkiami naalakkersuisut USA-mut mianersoqqussutigaat:
- Taamatut aalajangersaaneq akisussaassuseqanngitsumik periarneruvoq, piffissamilu mianernartumi, kinguaariit arlallit ingerlaneranni ikinngummut, iligisamut naalakkersuinikkullu suleqatigisamut pitsaangitsumik kinguneqarsinnaalluni. Tyrkiamiut naalakkersuisui nalunaarumminni taama allapput.
Tyrkiamiut isumaqarput, sakkutuujunngitsut akersuunneranni Armeniamiut toqutaasimasut, inuiannilli aaqqissuussamik toqoraasoqanngitsoq.
