Tyrkiamilu nunap sajorujussuarnera Danmarkimi nunatsinnilu uuttortaatinit malugineqartut

Tyrkiami nunap sajorujussuarnera Bornholmimi uuttortaaviup Danmarkimi siulliulluni malugaa.
Tyrkiami nunap sajunnerani tamaani Syriamilu ajunaarsimasutut maannamut nalunaarsorneqartut 1400-nit ikinnerunngitsut nalunaarutigineqarpoq. Assi © : Khalil Ashawi/Reuters/Ritzau Scanpix
Allattoq Ritzau
februaarip 06-at 2023 09:34
Nutserisoq Mads Lynge

Tyrkiap kujasissortaani seqineq suli nuinngitsoq nuna ataasinngornermi ullaakkut sajorujussuarpoq, Tyrkiamilu nunap sajorujussuarnera Danmarkimi nunatsinnilu uuttortaatinit aamma malugineqarsimapput.

Danmarkimi Kalaallit Nunaannilu ujarassiuutut misissuiffiup, GEUS-ip, tamanna nutaarsiassaqartitsivimmut Ritzaumiut uppernarsarpaa.

- Nunap sajunnera Danmarkimi Kalaallit Nunaannilu uuttortaatinit malugineqarsimapput, Tine B. Larsen, immikkut ilisimasalik GEUS-imeersoq oqarpoq.

Nuna Richterip nunap sajuttarneranik uuttuutaa naapertorlugu 7,8-tut sakkortutigisumik sajuppoq, Tyrkiamilu nunap immikkoortuani pineqartumi ukiut kingulliit hunnorujut ingerlaneranni sinnerlugilluunniit aatsaat taama sakkortutigisumik sajulluni.

Tyrkiami Syriamilu inuit hunnorujulikkaat ajunaarsimasut amerlanerusullu aqqunartitersimasut, Tyrkiami Syriamilu oqartussat nalunaarutigaat.

Tyrkiami illut 1700-nit amerlanerusut nakkaassimapput, inuppassuillu matoorussaasimasinnaanissaat taamaammat aarleqqutigineqarluni.

Tyrkiami nunap sajunnerani tamaani Syriamilu ajunaarsimasutut maannamut nalunaarsorneqartut 1400-nit ikinnerunngitsut nalunaarutigineqarpoq.