Tyrkiami turisteqarfissuarmi qaartoorneq
Tyrkiami feeriartarfiit nuannarineqarnerpaat ilaanni Antalyami qaartoortoqarmat inuit sisamat toqutaapput.
Nutaarsiassaqartitsiviup CNN-p tusarliussaa malillugu toqutaasut tassaapput Tyrkiamiut marluk, Ukrainimiu ataaseq Norgeminngaanneersorlu ataaseq.
Qorlortup Manavgatip eqqaani turisteqarfimmi qaartoorneq pivoq.
Ilimagineqarpoq gassiisivik qaartoorsimassasoq, qaartoornerli ajutoornikkut pisimanersoq suli ilisimaneqanngilaq.
Qaartoornermi danskit eqqorneqarsimanersut suli ilisimaneqanngilaq.
- Ajoqusersimasut akornanni danskinik peqarnersoq misissuileruttorpugut, nalugallarparpulli qaartoorfiup nalaani Danmarkimeersunik inoqarsimanersoq, Tyrkiami illoqarfiit pingaarnersaanni Ankarami konsuli Doris Andersen oqarpoq.
Nutaarsiassaqartitsivik Ritzau allappoq angalatitseqatigiiffiit arlallit oqaloqatigisimagitsik, danskinillu ajoqusertoqarsimaneranik tusagaqarsimanatik.
