Nunat EU-mut ilaasortaasut muuamaakkormioqarfiillu akornanni Tyrkiap isumaqatigiissitsiniarnissaanik EU-p siunnersuutaa, Danmarkimi naalakkersuisunit, Venstrenit Konservativinillu, illuatungiliuttunillu Socialdemokratinit ilassilluarneqarpoq – pingaartumik Folketingimut ilaasortamit, Hüseyin Arac-imit. Tyrkiap isumaqatigiissitsiniarnissaa Hüseyin Arac-ip nammineq februaari aallartisimalaaginnartoq siunnersuutigaa, nammineq Tyrkiami inunngortuuvoq.
Ministeriuneq Anders Fogh Rasmussen Hüseyin Arac-ip isumaqatigiissitsiniarnissaq pillugu qanittukkut ataatsimeeqatigissavaa, ataatsimiinnissarli qaqugu pissanersoq, sunalu siunnersuutilersaarnerini, Hüseyin Arac-ip oqaatigiumanngikkallarpaa.
Muuamaamilli Jyllands-Postenimi titartakkat aaqqiagiinngissutaaneranni Tyrkiap isumaqatigiissitsiniartuunissaa partiinit Naalakkersuisunut tapersersuisunit, Dansk Folkepartimit, akuersaaruminaatsinneqarpoq.
- EU-mut ilaasortanngornissaq taamaallaat Tyrkiap anguniarpaa, Europamut tunngassutilinnik Dansk Folkepartimi politikkikkut oqaaseqartartoq, Morten Messerschmidt, isumaqarpoq.
- EU-mut ilaasortanngorniarsaraluni uukapaatitsiniarnerinnaavoq, mianersuuttariaqarparput, Messerschmidt oqarpoq.
Tyrkiami ministeriuneq, Recep Tayyip Erdogan, isumaqatigiissitsiniartussatut Messerschmidtip piukkunnannginnerarpaa.
- EU-mut iluareqqusaaraangami oqaloqatigiinnissaq saammaateqatigiinnissarlu oqaluuserisarpai. Nunaminiitillunili killormorluinnnaq pisarpoq, soorlu killiligaanani oqaaseqarsinnaatitaanissani tusagassiuutinut nilliassutigisarpaa.
Tyrkia pinnani Naalagaaffiit Peqatigiit isumaqatigiissaarisuunissaat Morten Messerschmidtip siunnersuutigaa.