TV2-p Juullip Inua Finlandimi ujaarivaat

Juullip Inua sumi nunaqarnersoq suli persuarsiutigineqarpoq.

Danmarkimi TV-qarfissuup TV2-p isiginnaartartutik Finlandimut tikeraaqatigaat, aallakaatitami taasimanni 'Størst', tassa 'Annerpaaq', oqarlutik Juullip Inua Finlandimiuusoq.

- Finlandimiut oqartarput Juullip Inua Finlandimiuusoq, tassalu tamanna uppernarserusullutigu Juullip Inua ujarparput, aallakaatitami inuttaasoq, Peter Ingemann oqaluttuarpoq.

Juullip Inua Kalaallit Nunaanni najugaqarpoq

Taannali isiginnaartartunit tamanit isumaqatigineqanngilaq. Stig Christensenip aallakaatitaq takoreerlugu aviisimut Ekstra Bladenimut allagaqarpoq oqarluni, aallakaatitaq nuannersoq Danmarkimi ilaqutariinnut juullimik pigaartitsisunut tulluunnerusoq. Paasisinnaannginnerarlugulu allappoq, sooq aallakaatitassiaq Juullip Inuanut Kalaallit Nunaanniittumut tunngatinneqannginnersoq.

- Kikkut tamarmik nalunngilaat Juullip Inua Kalaallit Nunaanni najugaqartoq, taamaattumik isumaqarpunga, danskit kalaallinik nuannarisaqarut TV2-mit suusupagineqartut, Juullillu Inua Finlandiumiuunerarlugu ussassaarutigalugu, aviisimut Ekstra Bladenimut Stig Christensen ilaatigut allappoq.

Juullip Inua piviusuunngilaq

Aallakaatitami inuttaasup, Peter Ingemannip aallakaatitaq pillugu nassuiaateqarnermini eqqaanngilaa Juullip Inua sumi najugaqarnersoq, Juullilli Inua ilumuunngitsuusoq oqarluni.

- Aallakaatitap 'Størst'-ip sammisarpaa piviusuunngitsut aamma kinaassusersineqarsinnaanngitsut, Peter Ingemann aallarniivoq imalu ilanngussilluni nangilluni.

- Taamaannerpami? Tassami nunarsuatsinni meeqqat upperaat Juullip Inoqartoq, Peter Ingemann aallarniummini naggasiivoq.