TV-qarfik Inuktitut oqaatsit atorlugit aallakaatitsisartoq Canadami ammartoq

Uvagut Tv Nunavut Independent Television Networkimit ingerlanneqarpoq. TV-qarfik taanna Igloolimmit internetikkut aqunneqarpoq, filmiliortartorlu ilisimaneqarluartoq Zacharias Kunuk Isuma TV-lu suleqatigineqarlutik.

Uvagut TV Inuktitut aallakaatitsisarpoq. TV-qarfiup taassuma aallakaatitassianik kalaallisuunik aallakaatitsisarnissani qilanaarigaa, IBC-p aqutsisuata Karen Prenticep KNR-imut oqaatigaa.

Uvagut TV ulloq unnuarlu aallakaatitsisassaaq, Inuktitullu tassa aallakaatitsisassalluni. Naggueqatigiit Inuit tv-qarfiat ulloq unnuarlu aallakaatitsisartoq siulleq maanna tassa ammarneqarpoq.

Naggueqatigiit Inuit aallakaatitassiorfii assigiinngitsut suliaat Uvagut TV-kkut aallakaatinneqartarput, soorlu aamma nuna tamakkerlugu aallakaatitsisarfik Inuit Broadcasting Corporation, IBC, suleqatigineqartartoq. IBC naggueqatigiit Inuit aallakaatitassiaannik 1981-imili aallakaatitsisarpoq.

Meeqqanut aallakaatitassiat, filmiliat, nutaarsiassat allallu Uvagut TV-mi aallakaatinneqartassapput. Uvagut TV-mi aallakaatinneqartartut amerlanersaasa Inuit Broadcasting Corporationimeersuusassasut Karen Prenticep KNR-imut oqaatigaa.

Ukiuni kingullerni 40-ni aallakaatitassiat naggueqatigiit Inunnut tunngasut IBC-p pigigai Karen Prenticep taassuma saniatigut oqaatigaa, aallakaatitassiallu 9000-it ukiuni tulliuttuni aallakaatinneqarnissaat pilersaarutaasoq oqaatigalugu.