TV-mi radiomilu piukkunnartut allattugaatigineqalerput

TV-liornermi radioliornermilu piukkunnaatillit 18-it misilippaat KNR-ip immiussisarfiini assiliiviit mikrofonillu saanni atuaaneq. Aammattaaq misilippaat apersuineq.

- Piukkunarsinnaasunik misiliisitsinitta takutippaa inuusuttut tusagassiutini sulinissamut piukkunnartortaqarluartut. Amerlanerit assiliiviup mikrofonillu saanniinnermi misiliisimanngillat taamaattorli nangaanngivillutik misiliillutik. Assut kalaallisut pikkoripput piukkunnarluarlutillu, taama oqarpoq KNRip tusagassiisartua Naja Brøns.

Inuusuttut piukkunnartut misilippaat Qanoruup immiussisarfiani nutaarsiassamik atuaallutik aammalu apersuisuusaarlutik. Radiop immiussisarfiani misilippaat silassamik nutaarsiassamillu atuaaneq. Aamma naatsumik apersuineq misilippaat.

Misiliisitsinerup kingorna inuusuttut TV-mut radiomullu piukkunnartut allattugaatigineqalerput. Taakku attavigineqarumaarput suliassamik taakkununnga piukkunnartumik takkuttoqassappat.