TV-kkut takoqqusaarusiaq Tunumi immiunneqassaaq
Kommuneqarfik Sermersuup maanna immiussinissamut tapiissuteqarnera pissuteqarpoq, immiussassaq tulleq Tunumi immiunneqartussaammat.
Takornariartitseqatigiiffiup Destination East Greenlandip aamma Ace & Ace TV Produktionsip takoqqusaarusiaannut, A taste of Greenlandimut, Kommuneqarfik Sermersooq 100.000 koruuninik tapiissuteqarpoq.
Tv-kkut aallakaatitassiani "A taste of Greenland"-imik taaguutilinni immikkoortoq siulleq 2009-mi Kujataani, Tulummik igasumik aallakaatitsinermi ingerlatsisoqarluni, immiunneqarpoq.
Immiussinerit ukiormanna oktobarimi piareerneqarnissaat naatsorsuutigineqarpoq.
Aallakaatitassiani nersualaarneqaqisuni, takornariat amerlanerusut Nunatsinnukarusulernissaat aamma kalaallit nerisassiassaataasa nunanit tamalaanit piumaneqarnerulernissaat siunertaavoq.