TV-kkut piviusulersaarusiat Kalaallit Nunaanneersut amerlanerusinnaasorai
Tassami Nunatsinni maannamut misilittakkani aallaavigalugit piviusulersaarutinik allanik Nunatsinniit aallakaatitassiortoqarsinnaasoraa:
- Kalaallit Nunaannit oqaluttuarineqarsinnaasut amerlaqaat, tamakkulu oqaluttuarineqarsinnaanissaat kissaatigaara, "Ice Cold Gold"-imik suliarinnittoq David Casey oqarpoq.
Ilanilu Nunatsinnit ukiup aappassaa aallakaatitassiorput, misilittakkanilu aallaavigalugit allanik aallakaatitassiorusussinnaavoq:
- Maaniiginnarusuppugut, nunap atortulersuutaasa piorsarneqarnissaannut ikiuukkusuppugut, TV-kkummi isiginnaagassiorsinnaanissaq ajornaannerulersinneqartariaqarpoq, David Casey oqarpoq.
Taamatut aallakaatitassiornermi naammassisassarpassuaqarpoq, inunnillu attavigineqarsinnaasunik peqarluarnissaq taamaammat pingaaruteqartoq, taassuma oqaatigaa, misilittakkanilu aallakaatitassiorniartunut allanut ilinniartitserusussitigisinnaallugit.
"Ice Cold Gold"-imik aallakaatitassiat Nunatta avataanit isigineqarneranut iluaquteqarsinnaagaluarlutik aappaatigooqarsinnaasut, Nunatsinni takornarialerisut Visit Greenlandip pisortaata Anders Stenbakkenip oqaatigaa:
- Kalaallit Nunaata ulorianarsinnaanerata taama aallakaatitassiornermi takutinneqarsinnaanera aarlerineqarsinnaavoq, Visit Greenlandip pisortaa Anders Stenbakken oqarpoq.
Kalaallit Nunaanni pinngortitarsuup ulorianarsinnaanera aallaqqaammut takutinneqarpoq, Nunattalu avataanit isiginiarneqarneranik tamanna innarliisinnaagunaraluartoq, akerlianik aamma pisoqarsinnaanerarpaa:
- Nuna aatsitassarsiorfigissallugu ulorianarsinnaasoq takutinneqarpoq, taamaariarlunili ulorianarpallaanngitsutut aamma takutinneqarluni, tamannalu soqutiginarpoq, Visit Greenlandip pisortaa Anders Stenbakken oqarpoq.
Kalaallit Nunaat pillugu filmiliorniat ukiut ingerlanerini amerlasimaqisut, taassuma oqaatigaa, Nunatta isiginiarneqarneranik ilaatigut innarliisimaqalutik. "Ice Cold Gold"-imilli taallugu isiginnaagassiap Nunatsinnut iluaqutaasinnaanissaa, Stenbakkenip qularutiginngilaa.
"Ice Cold Gold"-imik aallakaatitassiortut Nuummiunit nersualaarneqarsimanertik nuannaarutigeqaat, tassami Nuummi umiatsiat orsiivianniitsillutik umiatsiaatilimmit nersualaarneqarsimanertik unnersiutigaa:
- Taassuma nunani taama kusanartigisumik ilisaritinneqarnera aatsaat tusarpaa, taamatullu oqartoqarnera nuannaarutigeqaara, "Ice Cold Gold"-imik suliarinnittoq David Casey oqarpoq.
Aallakaatitasiortut aatsitassrsiorsinnaanermut akuersissuteqarput, David Caseyllu oqaatigaa nassaat tamarmik Namminersorlutik Oqartussanut tunniunneqartartut.
