TV-kkut oqallittoqareermat siunnersuisarfiit ulapputtut
Atugarissaarneq pillugu ilisimatusarfiup SFI-p meeqqanut kinguaassiuutitigut atornerluisarneq pillugu nalunaarusiaa nutaaq TV-kkut oqallinnermi tunngavigineqarpoq. Ippassarlu unnukkut oqallittoqareermat, immikkut ittumik Attavik 146-mut MIO-llu sms-kkut kiffartuussivianut1899-mut saaffiginneqattaartoqarpoq. Sullivinni taakkunani sullissisut taama oqaluttuarput.
Aamma atuaruk Kinguaasiutitigut atornerluisarneq – Oqaluttuaq uteqattaartuartoq?
Aamma atuaruk Qulaarpaa Meeqqanut kinguaasiutitigut atornerluisarneq Qulaarpaap sammissavaa
Aamma atuaruk Qulaarpaa - Iterpunga kujakkaanga
Sapaatip akunnerani matumani Qanoruumi radioaviisimilu arnat arlallit misigisimasatik oqaluttuarisarlugit saqqummeqattaarput. Peqqinnissamut naalakkersuisioqarfimmi peqqissutsimut sulianut siunnersortip, Tina Evaldsenip aallakaatinneqartut erseqqissumik sunniuteqarnerarpai. Sapaatip akunneranimi matumani Attavik 146 ulapinnerusimavoq.
Saaffiginnittut arlaqartut
- Attavik 146-mut ippassaq unnukkut inuit 16-it saaffiginnipput, tamarmillu siornatigut kinguaassiuutimikkut atornerlugaasimallutik, Tina Evaldsen KNR-mut oqarpoq.
Meeqqat inuusuttullu oqaloqatiginnittarfiata MIO-p sms-ikkut kiffartuussivimmut saaffiginnissutit amerlanerit suliarisimavaat.
- MIO-p saaffiginnissutit qulit sinnerlugit ippassaq suliarai. Taakku niviarsiaqqanit nukappiaqqanit inersimasuniillu kingunipilutsitsisimasunit saaffiginnissutaapput, kinguaassiuutitigullu atornerluineq pillugu apeqquteqaateqarput. Saaffiginnissutit tallimat missaanniittut siunnersortinit piffissaq sivisunerulaartoq atorlugu suliarineqarput, meeqqanut siunnersorti Ellen Bang Bourup oqarpoq.
Ajunngitsumik kinguneqarpoq
Niviarsiaqqat 22 procentii nukappiaqqallu 5 procentii 15-it inorlugit ukioqalertinnatik kinguaassiuutitigut atornerlunneqarlutik pinngitsaalineqartartut, Atugarissaarneq pillugu ilisimatusarfiup SFI-p nalunaarusiaani nutaami ersersinneqarpoq.
Uani sapaatip akunnerata ingerlanerani inuit arlallit misigisatik pillugit saqqummerput. Taama ittunik aallakaatitassiorneq ajunngitsumik kinguneqarpoq.
Aamma atuaruk Qulaarpaa Pingasunik ukioqarluni atornerlugaasoq: Anniarnera suli eqqaamavara
Aamma atuaruk VIDEO Atornerlunneqarnermi kingorna ikiorneqarnissaminik ukiuni 17-ini utaqqisoq
Aamma atuaruk Qulaarpaa - Tallimanik ukioqarlunga kinguaassiutitigut atornerlunneqaqqaarpunga
- Kinguaassiuutitigut atornerlugaasimasut uagutsinnut attaviginninnissaanut sapiissuseqalersittarpai. Apeqqusiinermik kinguneqartarpoq, soorlu, sumut saaffiginnissaanga? Taamaattumik nuannaarutigisorujussuuarput immikkut ittumik kinguaassiuutitigut atornerluisarneq sammineqarmat, Ellen Bang Bourup MIO-meersoq oqarpoq.
Killissamik ilinniartitsinissaq
Meeqqat killissamik ilinniartissallugit inuit tamarmik akisussaaffeqarnerisa eqqaamaneqarnissaa pingaaruteqartoq taanna isumaqarpoq.
- Timitsinnut tunngatillugu killissamik meeqqat ilinniartinnissaat, angajoqqaajugutta, meeqqerisuugutta, ilinniartitsisuugutta innuttaaqataaguttalu akisussaaffigaarput, Ellen Bang Bourup oqarpoq.
Aamma atuaruk VIDEO Meeqqat naaggaarsinnaaneq ilinniassavaat
Atornerlugaanerup kingorna Kalaallit Nunanni unnerluutiginnissinnaanermut killigititaasoq pillugu MIO ilaatigut apeqquteqarfigineqarpoq. Sulianilu taamaattuni atornerlugaasimasup 18-nileereernerata kingorna ukiuni qulini unnerluutiginnissinnaatitaaneq atuuppoq.
