TV-kkut isiginnaarneq ajoquserneqartassaaq

TELE juunip aallartinneraniit nunarput tamakkerlugu tv-ikkut nassitsissutinik digitaliusunik ikkussuilluni aallartippoq. Maannamullu Nanortalimmiit Paamiut ilanngullugu ikkussuereersimalerluni.

Nuummi nassitsissutinik ikkussuinerup nalaani GSM-ikkut nassiussissutit Nuuk TV-illu nassiussissutaa TELE Greenlandip illorsuata eqqaaniittut qaminneqarallassapput. Tamannalu tv-imik isiginnaartartunut sunniuteqartassaaq. Taama TELE tusagassiuutinut nalunaaruteqarpoq.

Nassitsissutit pingasunngornermi nalunaaqutaq ullaakkut arfineq pingasuniit ullup qeqqata tungaanut qaminngatinneqassapput, sisamanngornermi ullaakkut arfineq pingasuniit ualikkut sisamat tungaanut, tallimanngornermilu ullaakkut arfineq pingasuniit ullup qeqqata tungaanut.

Nuummi nassitsissutit suliarineqareerpata Maniitsoq aamma Sisimiut tullinnguunneqassapput. Telep atortorissaarutinik iluarsaanini ukiup naannginnerani naammassissallugu naatsorsuutigaa.