Tv-kkut aallakaatitassiorfiit ingerlanerlunnerannut KNR pisuunngilaq
Tusagassiortup Marianne Langvardip Sisimiuneersup Sermitsiami ullumikkut saqqummersumi oqaatigaa, aallakaatitassiat sinerissameersut KNR-ip unitsikkai.
Ivalu Egedep oqaatigaa, tusagassiortup pissutsit killormut saatsinniarsarigai, allakkami tv-qarfiit mikisut aningaasarliornerat atorluarlugu KNR Sisimiuni immikkoortortaqarfimmik pilersitsiniartoq.
- Kommuninngortuni sisamaasuni, kommunit pingasut KNR-ip immikkoortortaqarfigai. Innuttaasunik kiffartuussisuulluta aallakaatitsiviuvugut, nunalu tamakkerlugu aallakaatitsisussaalluta, taamaattorli Qeqqata Kommuniani immikkoortortaqarfeqarata. Nuummi KNR-ip nutaarsiassaqartitsiviani atorfik inuttaqanngitsoq Sisimiunut inissinneqarsinnaavoq, taannami Nunatsinni illoqarfiit annersaannut tulliuvoq, Ivalu Egede erseqqissaavoq.
- Taamaalilluta aningaasartuutinik sipaarsinnaassagaluarpugut, taamalu aallakaatitassianik sinerissameersunik amerlanerusunik pisisinnaassalluta. Tassami suliffeqarfittulli allatulli isiginnaartartut tusarnaartartullu annertunerpaamik pissarsisarnissaat siunertaralugu suleriaatsivut pisariillisarpavut, Ivalu Egede allappoq.
Sisimiuni tv-kkut aallakaatitassiortartut marluk aningaasarsiornikkut ajornartorsiulernerannut KNR-ip pisuutinneqarnera Ivalu Egedep aamma ajuusaarutigaa.
- KNR-ip pisuutinneqarnissaa isumaqatiginngilara, taanna oqarpoq. Qanoruumut aallakaatitassiat sinerissamit pisiarisavut tamangajaasa Sisimiuni tv-kkut aallakaatitassiortartunut 700.000 koruunit nalinginut atorpavut. Amerlanerusunillu pisinissamut ukiup sinneranut akissaqanngilagut. Tamannalu aallakaatitassiortartunut nalunaaerutigereerparput, Ivalu Egede allappoq.
- KNR-imi aningaasaqarnikkut sakkortuumik aqutsivugut. Sinerissami tv-kkut isiginnaagassiortartut aningaasaqarnerminnik qanoq aqutsinera ilisimasaqarfiginngilara. Ajortumik ingerlatsisimassappata, tamanna KNR-imut attuumassuteqanngilaq. Tamanna nammineerlutik akisussaaffigaat, KNR-ip pisortaa Radioaviisimut taama oqarpoq.