TV-kanalit amerlanerulernissaat misissorneqarpoq

Nuna tamakkerlugu TV-kut kanalimik pilersitsisinnaanissamut apeqqut suli silaannarmiippoq, pilersitsinissamik tunngavissat, qanorlu aningaasalersornissaanut apeqqutit namminersornerullutik oqartussani suli suliarineqaramik.

Sinerissami TV-iutileqatigiit piumasaqartarnerisa inatsisartunilu ilaasortap Ruth Heilmannip apeqquteqaateqarnerata kingorna kultureqarnermut attaveqarnermullu pisortaqarfimmi atorfillit suleqatigiissitaliorput, qanoq, sunalu teknologi atorlugu TV kanalimik pilersitsinnaanissaq paasiniarneruniarlugu.

Suleqatigiissitaq siunnersuutissamik, suli naalakkersuisunut tunniusassaqanngikkallarpoq, tunngavissakippallaaqigamik, taama oqarpoq attaveqarnermut pisortaqarfimmi atorfilik Kasper Juul-Nielsen.

Tele Greenlandip pisortaanera Brian Buus Pedersen radioaviisimut oqarpoq Telep digitalimik TV, DVB-T-mik taaneqartartoq maanna TV-qarfinnut neqeroorutigisartagartik atorlugu, nuna tamakkerlugu atuutilernissaanut piareersimallutik.

DVB-T nuna tamakkerlugu atuutilernissaa 53 milliuuni koruuninik naleqassaaq.

Suleqatigiissitaliap TV-kanalip nutaassap aningaasartuutitassai kittaarlugit akilersorneqarsinnaanersut ilanngullugu misissussavaa.