Tuusip politikkikkut tapersersorneqarneq nuannaarutigaa
Suliap ingerlaqqissinnaanut neriulluartoqalerpoq, Inatsisartuni sapaatip akunnerata siuliani oqaluuserineqarnerani saqqummersitsiviliortoqarnissaanik Naalakkersuisut inanneqarmatali.
- Naalakkersuisuninngaanniit Inatsisartuninngaanniillu akuerineqarneq suliap ingerlateqqinnissaanut qiimmaallaataavoq. Aamma pilersitsiniarneq aatsaat piviusumik tamaviaarluta aallarteqqissinnaanngorparput, Josef Motzfeldt KNR-imut oqarpoq.
Aamma atuaruk Nunatta eqqumiitsulianik saqqummersitsiveqalernissaa qanilliallattoq
Nunatsinni Eqqumiitsuliat Katersugaasiveqalernissaanut aningaasaateqarfimmi siulersuisut ukiut arlerlugit suliniuteqarsimapput.
Aningaasaateqarfik 2006-imi pilersinneqarpoq, ukiorlu ataaseq qaangiummat aningaasanut inatsimmi ukiuni sisamani aningaasaliisoqarneratigut suliniut ingerlanneqarpoq.
Aamma atuaruk BIG ajugaavoq
Illussanik titartaanermi unammisitsisoqareersorlu 2011-imi titartaasarfik Bjarke Ingels Group ajugaasuuvoq.
- Kommuneqarfik Sermersuumi borgmesteri tassani ilaasortaavoq. Taamaammat naatsorsuutigaara kommunalbestyrelsip soqutiginninnini, maannamut nalunaarutigisartakkani, ingerlatiinnaraa. Taannalu aamma qularnanngilaq Nuummi piffissami qanittumi naapeqatigiinnermi tamatuma siulersuisut sinnerlugit qulakkeerniarnissaa isumannaarniagassama ilagisussaavaa, Motzfeldt oqarpoq.
Nunatsinni eqqumiitsuliat katersugaasiveqalernissaanut 200 milliuunit koruunit missaannik naalakkersuisut imaanngilaq aningaasalersuissasut.
Josef Motzfeldtilu naapertorlugu aningaasaateqarfinniit allaniit aningaasaliisoqarsinnaanera ajornannginnerulissangatinneqarpoq.
- Qularnanngilaq inunnik aningaasanik katersiniarnermi pingaaruteqartunik tallimanik arfinilinnilluunniit nassaarniartussaartariaqarpugut. Taakkualu ikiortigalugit aningaasanik katersiniartussaalluta.
Kultureqarnermut Naalakkersuisup, Doris Jakobsenip, suliniut piviusunngortinneqassappat ingerlatsinermut
Namminersorlutik Oqartussat aningaasaleeqataasinnaannerat oqaatigaa.
- Namminersorlutik Oqartussat pinngitsooratik peqataasussaapput. Taamatullu pingaartigaaq kommuni angerlarsimaffiusussaq pilersaarutit piviusunngornissaannut peqataassalluni nalunaareersimanera, Aningaasaateqarfimmi siulittaasoq, Josef Motzfeldt KNR-imut oqarpoq.
Nunatsinni eqqumiitsuliat katersugaasiveqalernissaanut suliniutit ingerlaannassappata 2020-imi suliniutip piareersimanissaa pilersaarutaavoq.
