Tuusip akerliunini illuartissimavaa

Puisi A/S pillugu suliami Lars-Emil Johansen aamma Josef Motzfeldt ullumi uppernassaapput, Lars-Emil Johansen Puisi A/S-imi siulersuisuni siulittaasuusimasoq imminut illersorluni oqarpoq taamani Namminersornerullutik Oqartussat 12 million koruuninik qularnaveeqqusiigamik nalorninartut suunersut nalusimanngikkaat.

Josef Motzfeldtilli taamani nunap aningaasaqarneranut akisussaasuusoq illuatungaanik isumaqarpoq, Puisi A/Sip siulersuisui nalorninartunik oqaaseqarsimannginnerarlugit. Ullumilu nassuerpoq nalorninartut tamakku piaarinani takusimanagit.

Paasiuminaatsoq, Lars-Emil Johansenimit saqqummiunneqartoq aana. Qanoq siulersuisut eqqartuussivimmut annertuunik aningaasanik mianersuaalliorsimasutut Namminersorlutik Oqartussanit tunniunneqarsinnaappat - Namminersornerullutik Oqartussat ukiut qulit matuma siorna siulersuisut taakkorpiaat qujaffigisimammagit suliamik unitsitsiinnannginnerannut.

Siumuup Folketingimut ilaasortaatitaa taamanilu Puisi A/Simut siulersuisunut siulittaasoq paasiuminaatsumut politikki akissutaanerarpaa.

2002mi qinersisoqareernerata kingorna Johansenip parteeqataata Hans Enoksenip naalakkersuisoqatigiinnissamut isumaqatigiissusiornerani Puisi A/S pillugu suliaq aallartinneqassasoq piumasaqaataavoq, taamani siullermik IA suleqatigineqalerpoq taava sivitsunngitsoq Atassut suleqatigineqariarluni IAmut utertoqarluni. Ullumili eqqartuussivimmi Johansen atinik taasaqanngilaq kingornalu oqaatigisani itisilerumanagit, uppernarsaanerminili oqaatigaa Namminersornerullutik Oqartussat taamani nalusimanngikkaat eqqartuussivikkuulerpat akisussaasumik nassaarnissaat annikitsuararsuusoq.

Johansen naapertorlugu Namminersornerullutik Oqartussat taamani qujasimapput Puisi A/Simi siulersuisut suliamik unitsitsiinnarsimanngimmata aammalu Namminersornerullutik Oqartussallu nalunngilluinnaqqinnaaraat nalorniartut suunersut. Ullumili uppernarsaasuusup aappaata oqaatigaa Puisi A/Simi siulersuisut nalorninartut suunerinik oqaatiginnissimanngitsut.

- Siulersuisut suliap nalorninartoqarnera soqutigisimarpasinngilaat, taamani aningaasaqarnermut naalakkersuisuusoq maannalu Inatsisartunut siulittaasoq Josef Motzfeldt ullumi killisiorneqarnermini oqarpoq.

Motzfeldt oqarnera malillugu nammineq Aningaasaqarnermut Naalakkersuisoqarfimmi atorfilittaminit suliap nalorninartoqarneranik mianersoqquneqarsimavoq, taakku siunnersuisimapput Puisi A/Simik suliap unitsinneqarnissaanik qularnaveeqqusiinerullu atorunnaarsinneqarnissaanik. Ullumi eqqartuussinermi Motzfeldtip nassuiarpaa sooq mianersoqqusisoqareeraluartoq Namminersornerullutik Oqartussat qularnaveeqqusiisimanersut. Aalajangerneq Motzfeldtip massakkut oqarneratut nammineq isumaqatigisimanngisani. Taannali naapertorlugu Naalakkersuisut annilaangatigisimavaat qularnaveeqqusiinngikkunik suliaq uniinnassasoq. Tassami suliaq unippat 38 million koruunit suliamut ukiut tallimat ingerlaneranni angusaqarfiunngitsuni atorneqareersimasut annaaneqassammata, minnerunngitsumillu siunissami aningaasat isertitassat annaaneqassallutik. Tamakkulu Naalakkersuisunit pingaarnerutinneqarmata Motzfeldt isumaqataanngikkaluarluni Naalakkersuisut sinnerlugit 12 million koruuninik qularnaveeqqusiisimalluni, ullumi nassuiaavoq.

Puisi A/S pillugu suliaq Nunatta Eqqartuussiviani suliarineqartoq unitsikkallarneqarpoq.

Killisiuinerit marlunngorpat aallarteqqinneqassapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat