Tuusi: Nunafondip aningaasartuutai naapertuutinngillat
- 3,2 milliuunit agguaanniarlugit allaffissornermi siulittaasoqarnermilu aningaasat 2,7 milliuunit ingerlatsinermut atorneqarsimappata, tamanna kialluunniit qularnanngilaq takusinnaassavaa, aningaasaateqarfiup suliniutinut ajunngitsunut siunertaqarluni suliniarneranut naapertuutinngitsutut oqaatiginiartariaqartut, Josef Motzfeldt oqarpoq.
Taanna siulersuisuni katillugit ukiut 16-ini ilaasortaassimavoq, 2003-miit 2005-mut siulersuisuni siulittaasuulluni.
Taamani siulersuisuni siulittaasup ajunngitsorsiai 10 000 koruuninit 15 000 koruuninut qaffanneqarput, siulersuisunilu ilaasortat sinneri 7500 koruuninik ajungitsorsiaqalerlutik. Josef Motzfeldt taama paasissutissiivoq.
Kisianni siulersuisut ajungitsotrsiaat taamanimiit qaffarujussuarsimapput.
Ullumi siulersuisuni siulittaasoq 100 000 koruuninik ajunngitsorsiaqarpoq, siulittaasup tulluia 50 000 koruunisisarput siulersuisunilu ilaasortat sinneri 30 000 koruunisisarlutik.
Josef Motzfeldt siulittaasuugallarmat aningaasaateqarfik aningaasanik ukiumut marloriarluni agguaasaraluarluni maannakkornit aningaasaliinerusarsimavoq.
Aningaasaateqarfiup ullumi ingerlanneqarnera aaqqissuussaaneruvoq siulersuisullu ukiumut sisamariarlutik naapittarput, taavalu aamma oqarsuaatilkkut mailikkullu arfinileriarlutik ataatsimiittarlutik.
Kisianni aningaasartuutit sooq taama qaffatsigisimammata siulittaasuusimasup paasisinnaanngilaa.
Inuiaqatigiit maanna sipaarniarnerat malinniartariqaraluaraat Josef Motzfeldt isumaqarpoq, tikkuarlugulu politikerit ajunngitsuliornermik siunertalimmik suliaqarnerminni qinikkatut suliffiminni aningaasarsiaminnik annaasaqarnavianngitsut.
Taamaammat allaffissornermut siulersuisunullu aningaasartuutit millisinneqarnissaannik kaammattuivoq.
- Taanna qimanneqassasoq neriuppunga siulersuisuni eqqartorneqassasoq. taamaalilluni inuiaqatigiinnut suliniutinut pitsaasunik aningaasat atorneqartussat amerlanerit taamaalilluni pissarsiarineqarsinnaassammata, Josef Motzeldt oqarpoq.
