Tuusi inuulluaqquarput
Qinersinerup kingorna Inatsisartut qinigaarlaat katersuuppata Nunatsinni naalakkersuinermik suliaqartut grand old man-iat, tassalu utoqqartaat, akornanniinnavianngilaq. Josef Motzfeldtip nuna tamakkerlugu naalakkersuinermik suliaqarneq unitsippaa. Motzfeldt nunatta inatsisartuinut 1987-imi qinigaaqqaarpoq.
Allattoq Peter Troelsen, Simon Uldum
februaarip 01-at 2013 06:10
Josef Motzfeldtip qinersinissap suaarutigineqarnera killitsisimaalaarluni malinnaaffigaa, killitsisimaarneralu pissutissaqarluarpoq. Inatsisartut siulittaasuat ukiuni 25-ini nunatsinni nalaakkersuinikkut suliaqarnini unitsinniarlugu aalajangersimavoq.
Josef Motzfeldt Inatsisartuni sivisunerpaamik ilaasortaavoq, 1987-imiilli ilaasortaasimalluni. nunatta inatsisartuini sivisunerpaamik ilaasortaasimasut tulleraat Ruth Heilmann, 1995-imi Inatsisartunut qinigaaqqaartoq. Ruth Heilmann qinigassanngorteqqissarnersoq suli nalunarpoq, Siumulli partiip qinigassanngortitai nittartakkamigut aqagu saqqummiutissamaarpai.
