Tuusi 70-liivoq
Taanna angutaavoq, Tuusimik taagorneqarluni Nunatsinni tamanit ilisarisimaneqartoq. Politikeritut misilittagartuutut isigisaavoq. Partiit maanna naalakkersuisuutitaqartut annersaata, Inuit Ataqatigiit, pilersinneqarnerani peqataavoq. Partii taanna ukiuni 13-ini 2007 tikillugu siuttuufiga.
1984-imili politikkikkut siuttunut ilaavoq, naalakkersuisunut inatsisartunullu ilaasortaalluni, 2009-milu namminersorneq eqqunneqarmat qinersisoqareernerani Inatsisartuni siulittaasutut unammillerteqarani qinigaafigaavoq.
Tuusi Igalikumi - najussallugu suli nunannareqisamini - inunngorpoq. Ilaatigullu islandimiut hestiannik, siusinnerusukkut inuuissiornerani IA-p tunissutaanik, hestertarluni.
Aamma illersornissaq pillugu danskit amerikamiullu isumaqatigiissutaannit 1951-meersumit allannguutit arlallit amerikamiut nunanut allanut tunngasunut ministeriannut Colin Powellimut Igalikumi atsiortippai, nunarsuup sinneranit malinnaaffigineqartumik.
Tamatuma takutippaa ilinniartitsisuusimasup allattarfissuaq qimallugu naqqit kusanarnerit tummisarilerlugit politikkikkut inuunermut minanersornartortalimmut nuukkami, qanoq isumaqatigiinniallaqqitsiginera.
Tuusi aamma politikikkut aalassatsitsisarpoq. Inussiarnersuuneratali ilakkuminartuuneratalu tamakkunannga ajunngivissumik aninguitittarpaa. Tuluit sakkutuuisa umiartortut naalagarsuattut Lord Nelsonitut qinngut isiminut tappitsunut inisiinnartarpaa, illuanillu qunguttareqaluni isinnguaartarluni.
Tamannaluuna nunatsinni tamat oqartussaanerani katersuuffigineqarneranut peqqutaagunartoq. Tamakkua pillugu oqaasissarpassuaqassagaluarpoq. Aamma ullup ingerlanerani pissusissaatut ullorsiutigineqalerpat, taama pisoqasagunarpoq.
