Tuttutassat agguaanneqarput

Ukiumi piniarfiusumi 2011-miit 2012-imut tuttutassat allanngungaaanngitsut, Aalisarnermut, Piniarnermut Nunalerinermullu Naalakkersuisoqarfimmiit nalunaarutigineqarpoq.

Pituffimmi innuttaasut tuttunniarsinnaalerput. Tamanna ukiuni arlaqalersuni Pituffimmi innuttaasut siunnersuisoqatigiiffiannit piumasarineqartarsimavoq. Qaanaamilu KNAPP tusarniaavigineqareermat, kissaat akuerineqarpoq piniarnissarlu oktobarip 15-nut killeqarpoq.  Kangerluarsussuarmi aggustip aallaqqaataaniit aappaagu apriilip 30-ata tungaanut killeqanngitsumik tuttunniartoqarsinnaalissaaq.

Avannaani Nuussuup qeqertaani, naalakkersuisoqarfiup tuttutassat 474-it aggustip aallaqqaataaniit oktobarip 15-ianut agguaateqqammerpai. Piffinnilu taakkunani Qaasuitsup Kommuniata tuttutassat inuussutissarsiutigalugu saniatigooralugulu piniartunut agguaannissaat isumagissavaat.

Ilulissat Kangerluaniit Kujataanut Ivittuut tikillugit killeqanngitsumik tuttunniarnissaq aammaanneqarpoq. Tuttunniarnissarli sivikillineqarpoq, tuttunniarfissarlu aggustip aallaqqaataaniit oktobarip 15-nut killeqarpoq.

Taamaattorli Sisimiut avannaaniit Nagssugtûp nunaaniit Nuup akia tikillugu piniarnermut allagartalinnut killeqanngitsumik tuttunniarsinnaaneq aggustip aallaqqaataaniit aappaagu februaarip 28-nut killiliunneqarsimavoq. Saniatigooralugu piniartunut oktoberip 15-iata tungaanut tuttunniarneq killeqassalluni.

Tuttuttassiineq tusarniaareersimanermi akissutigineqartut biologillu inassutigisaat tunngavigalugit pisoq, Ane Hansenip oqaatigaa.