Tuttut uranisiornermi eqqugaasinnaapput
Nunavummi uranisiulernissaq eqqarsaatigineqarpoq, tamannalu biologinit ernummatigineqalereerluni.
Uranisiortoqalissappat tuttut eqqugaanissaat biologit ernumassutigaat.
Nunarput assigalugu Nunavumi uranisiulernissaq eqqarsaatigineqarpoq. Nunavumi inatsisartut uranisiulersinnaaneq eqqartorsimavaat, taamatullu pisoqassappat tuttut eqqugaassasut biologit isumaqarput.
Biologit tuttoqassutimik ilisimasallit tusarniarniaaffigineqarsimannginnertik naammagittaalliutigigaat, Nunatsiaq News allappoq.
Uraanisiulernissamik misissuinerup ingerlanera tamakkerlugu, tuttut eqqugaassasut biologit ilaat Leslie Wakelyn oqarpoq.
Misissueqqaarnissat biologinit ernummatigineqarnerpaapput.
- Timmisartut nipitusaqisut qillerinerillu tuttut qimarratsissinnaavaat, tuttummi nipituumiikkusunneq ajorput. Misissuinerillu amerlanertigut tuttut piaqqiorfiisa nalaani aasami pisarmata, tuttut eqqornerlugaassapput, Leslie Wakelyn oqarpoq.
Qinngornerit navianartut pujoralaannit tuttoqarfiit tatsillu mingutsinneqalernissaat aamma biologinit ernumassutigineqarpoq.
Uranisiortoqartarnerani tuttut qanoq eqqugaasarnersut ilisimaneqarluanngilaq, Nunavumilu qaarusuliortiternerit maannakkut ingerlanneqartut tuttunut qanoq sunniuteqartarneri ilisimaneqaratik.
- Tuttut nalinginnaasumik aqqutigisartagaasa innarlerneqannginnissaat anguniarneqartariaqarpoq, biologi Leslie Wakelyn Nunatsiaq News-imut oqarpoq.