Tuttut piaraat nerisassaaleqipput
Silap pissusaata allanngoriartornera tuttut nerisaqarnerannut sunniuteqassangatinneqarpoq. Silap kiatsikkiartornera ilutigalugu siusinnerusukkut upernartalerpoq, tamatumalu kingunerisaanik tuttut nerisartagaat ivikkat siusinnerusukkut naasalerlutik. Tuttut juunip qaammataani piaqqiortarput taamaalineranilu nerisannaavi naasut inerereersimasarput.
Allattoq Louise M. Kleemann
maajip 09-at 2008 09:47
Silap pissusaata allanngoriartornera tuttut piaqqiortarnerannut piaraannullu qanoq sunniuteqarumaarnersoq suli uppernarsineqanngilaq, Kalaallit Nunaanni tuttunik misissuisoq ilisimatooq Peter Aastrup aviisimi ilisimatuussutsikkut paasisanik imaqartartumi Videnskabimi issuarneqarluni oqarpoq.
Pinngortitaleriffimmeersut upernaarmanna marsip 25-anniit apriilip 17-iat ilanngullugu Nuup Akiani Maniitsullu kujasinnerusortaani tuttunik kisitsipput.
Silap pissusaata allanngoriartornera tuttut amerlassusaannut qanoq sunniuteqarnersoq malinnaavigineqarpoq. Siusippallaarporli silap pissusaata allanngoriartornera tuttoqassusermut qanoq sunniuteqarnersoq oqaatigissallugu, Peter Aastrup oqarpoq.
