Tuttut neqaat amerlanngitsut pisiaassasut

Piniartut sunngiffimmilu piniartut qilaareqalugu utaqqissimasaat aqagu aallartittussanngorpoq, tassalu aavarneq.

Piniartut naatsorsuutigissanngilaat pisatik pisiniarfinnut toqqaannartumik tunisinnaasallugit. Namminersorlutimmi Oqartussat inuussutissanik nakkutilliineq pillugu inatsisaat naapertorlugu neqi toqoraavimmeersoq tunitsivinneersorlu atuisartunut anngutinnginnermini uumasat nakorsaannit nakkutigineqarsimasariaqarpoq.

Kalaalimineerniarfinnili neqit uummasut nakorsaannit nakkutigineqarsimasariaqanngillat, pisisartoq nammineerluni neqinik pitsaanersiuisinnaammat.

Aalisarnermut, Piniarnermut Nunalerinermullu Naalakkersuisoqarfiup kisitsisaatai naapertorlugit piniartut sunngiffimmilu piniartut tuttut 12.368-it 2010-mi pisaraat.

Piniartutut allagartallit taamani 2.083-upput. 

Taamali amerlatigisunik Kalaallit Nunaanni Brugsenit pisisinnaanngilaq, Brugsenit tuttut neqaannik 5-6 tonsinik, tuttut ilivitsut 150-it missaanniittut, Arctic Green Foodimit siorna pisivoq.

Nuummi Brugsenip neqaarniaasa pisortaat Martin Sonne erseqqissaavoq tuttut neqaannik  uumasut nakosaannit nakkutigineqarsimasunik pisisinnaallutik, piniartunik toqqaannartumik pisisinnaasaratik.

Neqi A/S Narsamiittoq ilisimatitsivoq tuttunik qanoq amerlatigisunik ukioq manna toqoraanissartik suli aalangersimanagu. Toqoraavik tuttunik 200-it missaanniittunik ukiut marluk matuma siorna toqoraavoq.

Narsami tuttuutilik Søren Janussen, qeqertami Tuttutuumi Narsap eqqaaniittumi 500-it missaanni tuttuutillip naatsorsuutigaa tuttunik 200-it missaanniittunik toqoraavimmut tunisissalluni.