Tuttut ilaanni miluuttoq nutaaq naviananngitsoq nassaarineqartoq
Miluuttoq uumassusillit ataasiinnarmik cellillit ilaqutariiussutsimikkullu ”Eimeriidae”-kkunnik taaguuteqartinneqartut ilagaat, ilisimatuussutsikkullu atertaatinneqarluni Eimeria tuttuii. tsiunneqartoq kalaallisuumiit latiinerisuumiillu akuugaavoq, oqaatsitsinniillu oqaaseq tuttu aallaavigalugu.
Miluuttoq Nuup eqqaani kangerlummi Ameralimmi tuttut arnavissat akornanni nassaarineqarpoq, imaassinnaallunili kangerlunni allani tuttuni aamma nassaassaasimassasoq. Eimeria tuttuii naatsorsuutigineqarpoq naviananngitsoq, tassami tuttut inalugaanni anaannilu tamaallaat nassaarineqarsimammat aammalu timaata sinneranut siaruarsimanani, Pinngortitaleriffik nittartakkamini taama allaaserisaqarpoq.
Miluuttoq Eimeria tuttuii
Pinngortitaleriffimmeersoq Christine Cuyler allaaserinneqataalu University of Iceland-imeersoq Karl Skirnisson taakkuupput miluuttumik paasisamik nutaamik ilisimatuussutsikkut allaaserinnittarfimmi ”Parasitology Research”-imi allaaserinnillutik qanittukkut saqqummiussisuusut.
Ameralimmi tuttut Norgemeersunit tuttunik nujuitsunik akusaapput, taakkulu 1950-ikkut aallartilaarneranni Ameralimmut nunaligussaanikuullutik.