Tuttut asuli toqorakkat

Alaskami naggueqativut piniartut Tikigameersut Kivalinermeersullu tuttunik 120-nik, nunami annertuumi qimaannarneqarsimasunut, toqoraasimasutut unnerluutigineqarput.
Allattoq Elisa Isaksen
juulip 31-at 2008 08:37

Tuttut ilaat neqqarinnersaannik piiaaffigiinnariarlugit qimanneqartarsimapput, tuttulli ilaat 60-it toqoriarlugit attoqqinnagit qimaannarneqartarsimapput. Tuttut piaqqat arnaminnit toqungasunit milunniarsarisut takuneqarsimapput.

- Pinngortitami isumalluutinik atuipilunneq aatsaat taamak atsigisoq naammattoorparput, Alaskami pinngortitamik nakkutilliisut aviisimut Anchorage Daily News-imut taama oqarsimanerarlugit nutaarsiassaqartitsivik UPI nalunaarpoq.

Inuusuttut 17-iniit 25-nut ukiullit tallimat toqoraasimasutut pasineqarput, piniarnermilli nakkutilliisut oqaatigaat toqoraaneq pillugu paasiniaaneq, tamaani nunaqartut suleqatiginnikkususseqarfiginngikkaat.

- Uumasut toqorarneqarsimasut assingi katersortarfimmi takutikkatsigik nipaannersuaqarpoq. Ingammik utoqqaat pisimasoq annilaarutigaat, taamaattorli inuusuttut pasineqartut, toqoraanerup nalaani takuneqarsimasut aqqi oqaatigineqarusunngillat, Alaskami pinngortitamik nakkutilliisut oqaaseqartitaat oqarpoq. Suliassarlu maanna politiinut suliassanngortinneqareerpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq