Tuttup neqaa qumaarsussuup qullugialik Maniitsumi pisarineqarpoq

Pinngortitaleriffik nalunaarpoq, tuttumik neqitamigut eqqumiitsortalimmik pisaqarsimasumit Maniitsumi aavartartut ilaannit saaffigineqarsimallutik.

Aavartartup takornagaanik tuttup neqaani mannissatut isikkoqartut qaqortut nassaassaasimapput. Tuttu angutiviaq ukiunik marlunnik pisoqaassusilik peqqippasikkaluarpoq. Pinngortitaleriffimmiut tuttup pineqartup assinginik aamma nassinneqarput, assillu taakku tamakkuninnga immikkut ilisimasaqartumut ingerlateqqinneqarput. Norgep inuussutissalerinermut ilisimatusarfeqarfiani Tromsømiittumi atorfeqartoq, Dr. Terje D. Josefsen, saaffiginnissut assillu takoreerlugit ilisimatitsivoq, tuttu qumaarsussuup qullugianissimasoq. Dr. Terje D. Josefsen oqarpoq, tuttu nerissallugu navianartuunngitsoq, kisiannili uulluarneqarluniluunniit sialluarneqartariaqartoq. Tuttu qullugiaqarpallaarpat allatut ajornartumik igiinnarneqartariaqassaaq.

Qumaarsussuit uumasuni kiisortuni, soorlu amaqquni, qimmini imaluunniit terianniani nalinginnaasuunerupput, taakkunaniittuusarlutillu, tassa qumanngornerminni taakkunaniittarlutik. Qumaarsussuit qullugiannguussinnaasarput tuttuni, kisiannili qumaarsunnguuttaratik. Tuttut qullugianittarput nerisaat terianniat anaannik akoqaraangata.

- Tuttut qullugiaqalersarnerat qaqutigoortuunngilaq, tamakkuli tuttoqarfinni tamani naammattuugassaasinnaasarput, Dr. Terje D. Josefsen oqarpoq.