Tuttunniarneq aallartippoq

Piniartut tuttunniarnerup oktobarip 15-iani uninnissaata tungaanut Nuussuarmi tuttut katillugit 474-it pisarisinnaavaat, kitaatali sinneranit pisassiissutigineqartut amerlassusiligaasimanngillat.

Nunatsinni tuttut amerlassutsimikkut nalinginnaasumik inissisimalluarput. Nuup pigisaani tuttorpassuaqarunnaarsimavoq, taamaattumillu tuttut tamarmik nerisassaqarlualersimallutik. Tamannalu pissutigalugu Pinngortitaleriffiup Nuup pigisaani ukiukkut tuttunniartoqannginnissaa peqqussutigaa, ph. d.-mik ilinniagalik Katrine Raundrup oqarpoq.

- Upernaaq manna tamanna peqqussutigaarput. Tuttorpassuaqarnera pissutigalugu siornatigut ukiukkut tuttunniartoqartarpoq. Amerlasuupilussuusimapput taamaattumillu aamma neriniartarfii killilimmik nerisassaqalersimallutik. Maannali ukiukkut tuttunniartoqartarsimanera ilaatigut pissutigalugu - tuttut ima amerlatigisut pisarineqarsimapput neriniartarfigisaat nerisassakilliorfiujunnaarsimallutik.

Pinngortitaleriffiup 2008-mit 2010-mut tuttut qaammataasamut nalunaaruteqartartunik qungasequsersukkat malittarisimavai. Ilisimatuullu tuttut sumerpiamiinnersut taamana takusinnaasarsimavaat. Maannali taamaakkunnaarsimavoq.

- Sumerpiamiinnersut maanna oqaatigissallugu ajornakusoorneruvoq. Upernaakkut aputip aakkiartulersarnera apeqqutaakkajuttarpoq. Nalunngilara piniartorpassuaqartoq sumorpiaq aavariassanerlutik paasisaqarusuttut, ajoraluartumilli taamaaliorsinnaanngilagut.

Katrine Raundrupip piniartut kaammattorpai pisanik immikkut nalunaarsuiffissaq immersoqqullugu. Pinngortitaleriffiummi sulinermini sakkussaraivai pingaarutillit, oqarpoq.

- Tuttumik pisaqarnermi allattorneqartussat ilagaat, sumi pisarinerlugu aamma qanoq suiaassuseqarnersoq. aamma tuttup qanoq utoqqaassuseqarnersoq missiliorneqassaaq. Aamma tuttup tunnoqassusaa uuttortarneqassaaq, tunnoqassusaami uumasup peqqissusaanik takutitsisarmat. Pualanerugaangamimmi aamma peqqinnerusarput.

Pinngortitaleriffik tuttoqatigiit anginerit kisiisa misissuiffigineqarnissaannut taamaallat akissaqarpoq. Tassalu tuttut Nuup pigisaaniittut, Kangerlussuarmiittut Sisimiuniittut kiisalu Nuup kujataatungaaniittut.