Tussunngunartumik allagartartaartitsineq
Nini Tessing allagartartaarnersiorluni oqalugiarmat kikkut tamarmik qullipipput. Oqalugiarmammi qatanngutini Poul Tessing inuunerminik annaassisimanerarlugu qutsavigaa, taassumami nammineq patiminik qatanngutiminut tunniussisimanngitsuuppat Nini toquinnarsimasinnaagaluarmat. Oqalugianngitsiartorli naapikkatsigu ima oqaluttuuppaatigut:
- Ilinniarnertuunngorniarluni itigartuaannartunngornissara ernumagileraluarakku qaangerakku nuannaaqaanga. Maannami 21-nik ukioqalereerpunga, uffa 19-niinnarnik ukioqarlunga ilinniarnertuunngornissara naatsorsuutigisimagaluaringa. Ilami taama sivisutigisumik ilinniarnertuutut naammassinialoornissara kissaatigisimannginnakku. Ila uattut angusaqarusuttuulluni ilinniarnertuutut naammassinera oqiliallaatigeqaara.
- Aamma atuaqatikka assigalugit allagartartaarnersiortinniarneqalerama nuanneqaaq, tassami ilattuulli pineqarnissara kissaatigisimavara, tassami inuuneq naliginnaasoq ileqqutoqqallu atorsinnaanngoqqinnissaat maqaasinaqimmata. Nini Tessing oqarpoq.
IA sinnerlugu folketingimi ilaasortaq Sara Olsvig Ninip naammassinerani oqalugiarmat qiassamik tupeqqasoq malunnarpoq:
- Tassa oqalugiarusunnersunga aperineqarama nuannaarutigisorujussuuara tulluusimaarutigisorujussuullugulu. Ninimmi aqqusaartugai tusarakkit misigissutsikkut attortissutigisimavakka, tamannalu oqalugiarninni aamma oqaatigalugu. Taamaammat inuusuttunut, ilinniarnertuunngorniartunut allanullu ilinniartunut maligasiuisuusoq isumaqarpunga.
- Taassumami naammassisaqarumanini aaliangiusimallugu ilinniarnini naammassivaa.
- Aamma naak assigiinngitsutigut aporfissarpassuaqaraluarluni naammassisinnaasimammat inuusuttunut allanut, ilami inunnut allanut maligassiuisuusoq isumaqarpunga, Sara Olsvig oqarpoq.
Nini Tessingip ilinniarnertuutut allagartartaarnerata saniatigut GU-ttut akornanni akiuulluarnerpaatut aamma nersornaasigaavoq.
Københavnimi Kalaallit illuanni Nini Tessingip allagartartaartinnersiorneqarnerata saniatigut illumi ilinniartutut ikiorti, Tupaarnaq Kreutzmann Serviceøkonomitut naammasseqqammersoq aamma nalliuttorsiutigineqarpoq.