Tuskip sermip aakkiartornera alakkarpaa

Donald Tuskip nunatsinni ulluni marluni angalanermini Kangerlussuaq tikeqqaassavaa, Kangerlussuarmiinnerminilu qaarsuit sermersuup aakkiartorneranit nuiartorsimasut Navigator Rocks-imik taaneqartartut alakkassavai, silap pissusianit allanngoriartortinneqartuni takusassaani siulleq.

Qaarsuit takoreerpagit sermersuaq Isunnguata Sermia, qallunaatut Russells Gletsjerimik taasartagaat, alakkassavaat, præsidentip taamaalilluni sermersuaq qanillivillugu takusinnaassavaa Dash-8-imut ilaallutik Ilulissiannginnerminni. Ilulissani Kangia nunanit tamalaanit tusaamaneqartoq alakkassavaa.

Nunatsinni angalaarnissaat qanittumi aatsaat pilersaarusiorneqarluni aallartikkaluartoq takusassarsiorniaannarlutik angalaassanngillat.

Issittumut periuseq nutaaq

Apriilimmi naanerani EU-p Issittoq pillugu politikkimik, suliniutinik 39-nik imalimmik, isummiusseqqammerpoq, suliniutit silap pissusiata allanngoriartorneranut, avatangiisimik illersuinermut, atasinnaasumik ineriartortitsinermut nunallut tamalaat akornanni suleqatigiinnermut tunngasuupput. Isummiussiinnanngillalli apriilimmi naanerani nalunaarusiaq silap pissusianut suliniuteqartoqarnerusariaqarneranut tunngasoq saqqummerpoq.

Taamaattumik EU Issittumi ilisimatusarnermut tunngasunik, soorlu mingutsitsinermut silallu pissusaata allanngoriartornerata kingunerisaannut tunngasunik, attaveqarfiliorniarpoq.

Aalisarneq, uuliasiorneq gassimillu aallerluni qillerineq, umiarsuillu aqqutissaat nutaat EU-p nunat tamalaat akornanni suleqatigiissutissatut piukkuppaat.

Qularnanngitsumillu tamakkorpiaat Donald Tuskip, Lars Løkke Rasmussenip Kim Kielsenillu ulluni tullerni marlunni oqaluuserissagaat.