Tusintilikkaat nunarput paasisaqarfigissavaat
Biennalen tassaavoq sanaartugassanik ilusilersuisarneq pillugu saqqummersitsisarnerit Nunarsuarmi annersaat, ukiut allortarlugit pisartoq. Nunat peqataatitaqartut ilanngussaat saqqummersitsisarnermi qitiusarput, tamakkualu amerlanersaat illoqannginnersatoqqaami kusanartumi Giadinimi takuniarneqarsinaapput. Qallunaat saqqummersitsivissaata piareersarnera Dansk Arkitektur Centerip isumagaa, ujarassiooq kalaalleq Minik Rosing qallunaat saqqummersitaannut illersuisuulluni.
- Siunissami ornitatsinni inuttut qangatoortutut, 2000-ikkunnut peqqammertutut, immitsinnut isigineq allanilluunniit isigineqarneq iluaqutaanngilaq. Siumukartupilussuartut uagutsinnut isigissaagut. Tassalu Kalaallit Nunaat takutinneqassaaq, isumaginninnikkut suliassatuunngitsoq, inuiattulli oqaluttuarisaaneqartutut, siunissaqartutut kinaassuseqartutullu allanut soqutiginaateqarsinaasumik, Minik Rosing oqarpoq.
Saqqummersitsineq suleqatigiiaanit, tamarmik immikkut qulequttamik sammisaqarsimasunit pinngortinneqarpoq. Assersuutigalugu Nuummi Tegnestuen-imeersut qallunaanik ilusilersuisartunik BIG-imik suleqateqarlutik imarpikkoortaatinut tulattarfissamik mittarfiutigisumik Nuummiittussamik siunnersuusiorsimapput. Titartaasarfik Qarsoq ilusilersuisarfik Clement & Carlsen aaamma titartaasarfik Vandkunsten suleqatigialugit illuliassamik, issittumut naleqqussakkamik, titartaasimapput. Kitaa Arkitekter, David Garcia Studio aamma Henning Larsen Arkitekter takutitsiniarput, qanoq ilioraanni Ilulissat inuppassuarnit nunanit allaneersunit tikerarfigineqalernissaannut naleqqussarneqarsinnaanersoq. TNT-p Elkiær og Ebbenskov og Hausenberg peqatigalugit aporaaffiulersussat, Nunatsinni siunissami oqaloqatigiissutigineqartariaqartut, qanoq iluarsineqarsinaanrannik suliaqarsimasut.
Qallunaat Biennalimi saqqummersitsinerat Kronprins Frederiup marlunngorpat ammassavaa. Saqqummersitsineq qaammatini pingasuni Venedigimiitinneqassaaq - taavalu Nunatsinni illoqarfinnut arlalinnut nunarssuamilu assigiinngitsuni angallanneqassalluni. Saqqummersitsineq Venedig-imiitillugu inuit 170.000-it alakkaassasut ilimagineqarpoq.