Tusindit sinneqartut Indiami tigusarineqarput
Akerliussutsimik takutitsisut kamaatigaat Bollywoodimi filmiliaritittartut tusaamasaanersaata ilaata Saruk Khanip tamanut tusarliullugu tupigusuutiginerarmagu kricketimik unamminissarsuarmi qaammatip tulliani aallartittussami unammisartut Pakistanimit akeratoqarsuarminninngaanneersunik unammisussanik tigusisoqarsimanngimmat, DR allaaserinnippoq.
Hindut upperisarsiortut inuiaassutsiminnik pingaartitsisut tuusintilikkuutaat partiimit talerperliuniartuminngaanneersut ullumi Mombayip aqquserngisigut arpaliupput filmillu nutaap allagartarsui piiarlugit, filmertarfiillu filmip "My name is Khan"-ip takutinneqarfii ujaqqanik milloorlugit, tassa filmimi pingaarnersatut inuttaasoq kamaakkamikku.
Taanna Sharuk Khanimik ateqarpoq muslimiullunilu, tamannalu hindumik upperisalinnut inuiaassutsiminnik pingaartitsisunut kamaatigissallugu naammalluni. Qanittukkulli Khan saqqummerpoq oqarlunilu uggornarnerarlugu Pakistanimiut qaammatip tulliani kricketimik unamminissamut qaaqquneqarsimanngimmata.
Kricket nunani marluusuni taakkunani inuiattut timersuutaavoq hindullu inuiaassutsiminnik pingaartitsisut musliminik Indiamiunik akaarisaqarneq ajoraluarput aatsaalli musliminik Pakistanimiunik iluamik akaarinngisaqartarlutik, taamaalillunilu Sharuk Khan hindunik inuiaassutsiminnik pingaartitsisunit nunaminik killuussisutut isigineqalerluni.
Partiimeersut oqarput hindut qangaanilli pingaartitaat illersorlugit, partiili akuttunngitsumik partiitut assigiinngisitsisutut isigineqartarluni. Tamatumanilumi aamma pingaartitat pingasut ataatsikkoorput, tassalu Bollywoodimi filmiliat, kricketimik unammineq Pakistanimullu qanoq pissuseqarneq.
Sharuk Khanili eqqissimalluinnarpoq. Taamatununa misigisimasunga, taanna taama oqarpoq, iliuuseqarnerlu sakkortooq tupigusuutigalugu.
Sharuk Khanip filmi inuttaaffia tallimanngorpat takuteqqaarneqassaaq politiillu 21.000-it filmertarfinnik illersuisussat aqqusinerniitinneqassallutik.
