Tusindilippassuit namminneerlutik inissarsisinnaapput

Innuttaasorpassuit, akikitsumik attartorlutik ullutsinni ineqartut, namminneq inissiartaarnissanut illutaarnissaminnulluunniit periarfissaqartarput. Inissiat pillugit politikkikkut nalunaarusiami, pisortatigoortumik qanittukkut saqqummersumi, Naalakkersuisut tamanna erseqqissaatigaat.
Allattoq Carla Davidsen
apriilip 23-at 2012 11:22

Isertitat misissoqqissaarnerisigut Naalakkersuisut naatsorsorsimavaat, nunatsinni innuttaasut qanoq amerlatigisut namminerisaminnik inissiartaarnissaminnut/illutaarnissaminnut akissaqarnersut.

Naatsorsuinerit takutippaat nuliariit aappariilluunniit 1.775-it ima aningaasarsiarissaartigisut illutaarsinnaallutik. Tassa aappariit ininik attartortut tamarmik 28 procentii. Aappariit nuliariilluunniit taakku Nuummi, Sisimiuni, Ilulissani Aasiannilu najugaqartuunerupput, illoqarfiit taagorneqartutut tulleriiaarlutik.

Aappariit 688-it 110 kvadratmeterisut angitigisumik namminneq inissiartaarsinnaapput/illutaarsinnaapput, sinneri 1.087-it 85 kvadratmeterisut angitigisumik inissiartaarsinnaallutik.

Katissimanngitsut 4.600-t 65 kvadratmerisut angitigisumik namminneq inissiartaarsinnaapput. Katinneqanngitsut ininik attartortut tamarmik 14 procentii. Taakku Nuummi, Sisimiuni, Ilulissani, Qaqortumi, Aasianni Maniitsumilu najugaqartuupput.

Ininik attartortut amerlanerpaat namminneq inissiartaarnissaat/illutaarnissaat Naalakkersuisut neriuutigaat, erseqqissaatigalugulu, inissianut pisortat tapiissutigisartagaasa amerlanersaat - tassa 300 millionit koruunit missaat - innuttaasunut ikiorserneqarnissamut pisariaqartitsinngitsunut - ullumikkut tuttartut. Nammineq inissiartaarnissamut/illutaarnissamut aningaasanik attartortitsinikkut, aamma inissianut attartukkanut appasissumik akeqartitsinikkut, tamanna pisarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq