Tusilartut Ugandami atugarisaat Nunatsinninngarnit pitsaanerupput

-Kalaallit Nunaanni tusilartut atugarisaat pitsaanerpaajunngillat kinguarsimasorujussuullutillu. Pissutsit nunanut ineriartortunut assersuussinnaavakka, siunnersorti Birthe Petersen oqarpoq.

Taanna tusilartunik 18-inik Nuummi pikkorissaaleruttorpoq. Tusilartunut atugassarititaasut ilisimasaqarfigisani allat assersuuteqarfigai.

- Ugandami tv-kkut nutaarsiassatigut ussersortumik nutserisoqartarpoq. Ugandamilu tusilartut attaveqaateqarluarput, atugassarititaasullu pitsanngoriartorlutik, Birthe Petersen nassuiaavoq. Kalaallit Nunaannilu tusilartunut atugassarititaasut uparuarlugit.

- Tusilartunut atugassarititaasut eqqarsaatigalugit Kalaallit Nunaat tusilartunut nunagitissallugu pitsaanerpaajunngilaq, tassami tusilartut avinngarusimallutik najugaqartarput, nunaqarfimmi imaluunniit illoqarfimmi tusilartutuaasarlutik. Attaveqarnissaminnullu periarfissaat annikitsuaraasarput.

Taamaattorli tupinnartua uaniippoq, tusilartut inuunertik naammagisimaarlugu oqartarput, tassami pitsaanermik atugaqarsinnaallutik ilisimannginnamikku, Birthe Petersen oqarpoq.

Innarluutit pillugit ilisimasaqarfiup siunnersuisarfiutigisup pilersinneqarnera Birthe Pedersenip pitsaasuusoraa. Tassanilu tusilartut pillugit ilisimasat katersorneqarnissaat neriuutigalugu.

- Tusilartut pillugit ilisimasat Kalaallit Nunaanni amigaatigineqarput. Tusilartut kiisalu tutsarluttut pillugit ilisimasat, kiisalu attaveqatigiissinnaanermik ilisimasat katersorneqartariaqarput. Tassa tusilartut pitsaanerpaamik ikiorsinnaanissaat qulakkeerniarlugu katersuisoqartariaqarpoq, Birthe Petersen oqarpoq.