Tusilartut qarasaasiamik tunineqarnissartik kissaatigaat

Tusilartut 17-it illoqarfinni assigiinngitsuni najugaqartut qarasaasiamik atuinissamut pikkorissartinneqarnerat iluatsippoq.
Allattoq Jaaku Lyberth
novembarip 14-at 2009 17:17

Imminnut allaffigeqatigiissinnaanngorput, ilaquttaminnut pikkorissaqatigisaminnut pikkorissaasunullu e-mailikkut allattalereerput tamarmillu e-mail adresse taarput, tusilartut qarasaasiamik atuisinnaalernissaannik pikkorissartitsinermik aaqqissuussisoq Johanne Olsen Namminerlutik Oqartussat Innarluutit pillugit Ilisimasaqarfiani Siunnersorti oqarpoq. Taamaakkaluartoq peqataasut tamarmik qarasaasiamik pigisaqanngillat. Johanne Olsen tusilartut pikkorissartinneqarnissaat sioqqulugu Kommuninut sisamanut saaffiginnippoq, tusilartut qarasaasiamik tunineqarsinnaanersut aperaluni, kommuunnillu saaffigineqartut tusilartunut qarasaasiamik tusisinnaanatik nalunaarput. Johanne Olsen neriuppoq tusilartut qarasaasiamik atuinissaannut pikkorissartitsineq iluatsittumik kinguneqassappat, kommuunit tusilartunut qarasaasiamik tunisiumaartut. Pikkorissarneq naammassereeraluartoq suliniutit ingerlassapput, tusilartut attavigineqartassapput, tusilartullu qarasaasiaqalernissaat anguniarneqarpoq.

Ilaqutaasut ussersornermik ilinniartinneqarnissaat tusilartut Nuummi katersuunneranni kissaatigineqarpoq. Tamanna anguneqassappat Namminersorlutik Oqartussat Innarluutillit pillugit Ilisimasaqarfimmit naalakkersuinermik suliaqartunut saqqummiussinnaavaat, tassanilu aningaasat apeqqutaasut Johanne Olsen oqarpoq. Ilaqutaasut ussersorlutik pikkorissartinneqarnissaannut aningaasaliisoqarpat, tamassuma piviusunngortinneqarnissaanut Innarluutit pillugit Ilisimasaqarfik piareersimavoq. Kissaatit annertuut ilagaat kommuunini inunnik sullissisut ussersornermik ilikkagaqarnissaat. Tusilartut katerisimaartinneqartarnerat ukiut tamaasa pisalissasoq Isumaginninnermut Naalakkersuisoq Maliina Abelsen neriorsuivoq.