Tusilartut isiginnaartitsilerput

Harald Haraldsen Isortumeersoq Canadamiut, Islandimiut, Norgemiut, Savalimmiormiut qallunaallu peqatigalugit isiginnaagassiami peqataalerpoq.
Allattoq Noah Mølgaard
februaarip 20-at 2013 10:04

Najoqqutassiaq suli naammassineqanngilaq sammisaqarlunili suliaqarnermi workshopimi ilusinikkiartorumaarpoq. Maannangaarli aalajangiunneqareerpoq isiginnaagassiaq tusilartunut tusaasaqarsinnaasunullu sammisinneqassasoq, Kommuneqarfik Sermersooq nittartakkamini allappoq.

Nunat killeqarfii akimorlugit suleqatigiinneq nunatsinniit peqataaffigineqartussanngorpoq. Inuusuttut tusilartut 15-it nunanit assigiinngitsuneersut katersorneqassapput taakkulu isiginnaartitsinermik inuussutissarsiutillit suleqatigalugit sulissapput. Isiginnaagassiaq aasamut junimi Islandimi takuteqqaarneqassaaq. Tamatuma kingorna Nunatsinni, Norgemi, Danmarkimi Savalimmiunilu takutinneqassaaq.

Tamanna pereerpaat isiginnaartitseqatigiit juulimi Frankrigiliassapput tassani Festival Clin d'oeil peqataaffigissallugu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq