Tusilartup nutserisussaaleqineq kiserliornaraa

Tusilartut Nunatsinni najugaqartut kiserliortarput. Ussersorsinnaasunik nutserisussaaleqineq peqqutaalluni tusilartut avatangiisiminnik attaveqarsinnaanerat killeqartarpoq. Tamakkuupput attaveqaatit pillugit tusilartut Nuummi pikkorissartinneqarneranni sammineqartut ilaat.
Allattoq Oline I. Olsen
novembarip 12-at 2009 08:27

Tusilartoq Lullu Geisler 23-nik ukioqarpoq Sisimiunilu najugaqarluni, taanna kiserliortutut misigisarpoq. - Ussersorsinnaasumik nutserisoqalernissaa kissaatigingaluarpara, Lullu Geisler ussersorluni nassuiaavoq. Lullu Geisler attaveqaatit pillugit Nuummi pikkorissarpoq, pissarsiaqarluarnissanilu neriuutigaa.

- Lullu, Sisimiuni najugaqarpoq, ussersornermi nutserisutta Lisa Marie Josefsenip Lullu Geislerip ussersorluni imminut ilisaritinnera oqaasertalersorpaa.

Lullu Geisler eqqiaasutut suliffeqarsimagaluarpoq maannali suliffeqanngikkallarluni. Taanna tusilartuunini pissutigalugu kiserliortutut misigisarpoq, tassami inunnik allanik attaveqarsinnaaneq killeqartarmat. Lisa Maria Josefsenip Lullu Geislerip nutserisussaaleqisarnerminik oqaluttuarnera ima oqaasertalersorpaa.

- Nammineq eqqarsaatigisaraluarpaa maani Kalaallit Nunaani siunissami nutserisoqassasoq, assigiinngitsunut atorneqarsinnaammat. Napparsimavimmut saaffiginninnermi nutserilluni, atuarfimmi atuarnermi nutserilluni kiisalu misilitsinnermi nutserisuusinnaalluni, Lullu Geisler ussersorluni oqaluttuarpoq. Nakorsiarnermini nakorsaq ussersorsinnaangitsoq assersuutigaa.

-Nutsersisussaq amigaatigiuarpara, taamaattumik allannikkut attaveqatigiittarpugut, piffissarlu annertooq taamatut atortarparput, Lulle Geisler ussersorpoq.

Lullu Geisler ulluni makkunani Katuami tusilartut 17-it peqatigalugit qarasaasiamik pikkorissaleruttorpoq, Lullup tusilartut allat naapeqqinneri nuannaarutigeqaa, tusilartoqatinimi Sisimiuni kingullermik ukiut arfineq pingasut matuma siorna naapippai. neriupporlu attaveqaatitigut periarfissat pillugit paasisaqarumaarluni.

- Attaveqarsinnaaneq immaqa pitsaanerulaalissaaq, pissutigalugu tusilartut attaveqarfigisinnaalissagakkit. Kisianni peqatigalugu oqaloqatigalugulu allaaneruvoq, naak qarasaasiakkut attaveqatigiissinnaaneq aamma ajunngikkaluartoq kisianni suli misigisinnaavunga kiserliorlunga, Lullu Geisler oqarpoq.

Lullu Geislerip tusilartutut atugarisani pitsanngussappata, taava ussersorluni nutserisinnaasunik ikiorteqalernissaq pingaarnertut tikkuarpaa.

Lullu Geislerip igasunngornissani takorloortarpaa, ilinnialissagaluarunili Danmarkimut nuuttariaqassalluni nassuiaatigaa.