Tusassinik atuisut suliffeqarfiit akilersorpaat
Oqarasuaatinik atuisunit TelePostimut annertuumik aningaasanik sinneqartoorfiuvoq. Saniatigullu suliffeqarfiup atuinernut allanut tuniniagarisartagaanut amigartooruteqarfiulluni. Tamanna ingerlanneqarsinnaavoq suliffeqarfiup ilumini aningaasat nuutsiternerisigut, tassa amigartoorutit sinneqartoorutinit matussusernerisigut.
Tamannalu kaaviaartitsineq Tele pillugu nalunaarutip 2006-ernisap suliarereernerata kingorna unitsinneqartussaagaluarpoq, ajornaatsuinnaanngilarli.
Akiviusunik atuilerneq tapiissutinik ersersitsivoq
Tunisassiat ilaat suliffeqarfiup sinneqartoorutai akigalugit appasitsinneqarput.
Tamannalu Lanlinkimik atuinermut aamma aaqqiissutaasimagaluarpoq. Oktobarilli aallaqqaataani akiviusut atuutsinneqalissapput.
- Oqaannarsinnaavugut tamanna isumaqartoq suliffeqarfissuit iluminni imminnut attaveqaasersorneri Tusassimik atuisunit akilerneqartartoq, Nalunaarasuartaateqarnermut aqutsisoqarfimmi pisortaq, Nicolai Odgaard Jensen oqarpoq.
Tamanna sekuntimut 4Mbitimik attaveqarnermut 250 koruuniniit 775 koruuninut akit qaffanneqarneranik kinguneqassaaq.
Taassuma erseqqissarpaa ammanerulersitsinermi paasisaqarfigerusunneqartoq qanoq akuersissutaatillit suliatik ingerlattarneraat. Tassa imaalluni TelePost akisuallaarnersoq imaluunniit naamik.
Politikkikkut pingaartinneqartariaqarpoq
Tamaammat Odgaardimut pingaaruteqarpoq aningaasat ingerlaartut paasinissaat, aammalu suliffeqarfiit atuisut akilersugaat appasitsinniarlugu tusassimik atuisut akiliinerunissaat ajoqutissaqartinngilaa.
- Pingaarnersiuineq taanna kissaatigineqarpat, nalunaarasuartaateqarnermut aqutsisoqarfimmit ajorinngilarput. Kisianni Telepostip iluani pingaarnersiunerunani politikkikkut pingaartinneqarnissaa pingaaruteqartoq isumaqarpugut.
Aamma atuaruk Mobilinik atuisut internettimut akileeqataasarput
Akigititagut qaffasipput
Telepostillu akigititanut nutaanut nalunaarutaa saqqummersoq kingulleq aqutsisoqarfimmiit nuannaarutigineqarpoq immap naqqatigut kaapili attaviusup akiisa apparsimanerat. Nicolai Odgaard Jensenip oqaluttuaraa akit misissoqqissaarneqassasut akillu naleqqunnersut nalilerneqassasut.
Aamma atuaruk Angerlarsimaffimmit sulisartut ammanerulersitsinermi eqqugaassapput
Maannakkut oqaatigisinnaannginnerarpaa, kisianni Norgep avannaaniit savalimmiuniit Islandimiillu akit assersuutissagaanni nunatsinni akikitsuunngillat.
- Akinik naleqqersuussiffigisarfigisagut naliginnaasut, akigititai annertuumik annikinneroqaat. Tamannalu Kalaallit Nunaanni akisuneruneranut suna tunngaviunersoq misissussavarput. Ilumut nioqquteqarfinni assigiinngitsuni akiliutit aningaasartuutaasartut assigiinngissuteqarnersut, nalunaarasuartaateqarnermut aqutsiveqarfimmi pisortaq, Nicolai Odgaard Jensen oqarpoq.
Aamma atuaruk Ammanerulersitsineq Peqqinnissaqarfimmut akisussaaq