Tusass`imi aserorterisunik politiit suli killisiuinngillat
Juunip naanerani Tusass´ip antenemut tigooraaviata uliguaa ammalortorsuaq radomimik taaguutilik aserorterivigineqarpoq, politiilli suli aserorterisunik tigusaqaratilluunniit killisiuinngillat.
Kalaallit Nunaanni politiit taama paasissutissiipput, taakkumi juunip 28-iani nalunaaqutaq 11.30 tamanna pillugu kalerrinneqarsimapput.
Radome tassaavoq ammalortorsuaq qaqortoq arsarujussuartut isikkulik. Taanna Nuummi Farip Aqqutaani Tusass`ip illutaata tunuatungaaniippoq, annertuumillu putuneqarsimalluni.
Taassuma iluaniipput satellitimut antennemut attaveqaatinut atortorpassuit tassa, fastnetimut, mobilinut, internetsimut, TV-mut aammalu Qaanaamut radiokkut atassuteqaammut, Pituffimmut, Savissivimmut, Nerlerit Inaannut aammalu Upernavimmut, Tasiilamut Ittoqqortoormiunullu attaveqarnissamut peqqumaatissat.
Aatsaat taamak sualutsigaaq
Radomip Nuummiittup aserorterivigineqarnera siusinnerusukkut takoreerparput kisianni annikitsuinnarmik putulaaginnarlugu, aatsaallu taamak annertutigisumik putuneqarsimavoq, Tusass´imi immikkoortortami ittuusoq Sohn Krog Petersen oqarpoq.
Radomip iluaniit aserorterivigineqarsimanera, assiliisoq: Tusass
- Taamaaliortoqarsimanera pinartutut isigaarput mianersoqqussutigissavarpullu aserorterineq taamaattoq Tusass´iinnarmut tunngimmat aammali Kalaallit Nunaanni telekkut attaveqaatit tamarmik kalluarneqarmata, soorlu telefoni, mobiltelefoni, internetsi, TV, aammalu KNR Radio nipaaruttarsinnaalluni, Jonas Hasselriis Tusass´imi teknikeqarnermi pisortaq oqarpoq nangipporlu:
- Inoqarfiit arlallit attaveeruteriataassappata tamanna pinartorsiornerulissaaq, nutaanillu atortunik sillimmatissamaatinilluunniit pisaartussanngussagaanni inuiaqatigiinnut tamanna millionikkaanik naleqartussanngorsinnaavoq.
Aserorterinerit qaqutigoorput
Radome maanna aaqqinneqareerpoq, iluaniittullu atortut ajoqusersimanngillat.
Tusass´ip pisoq politiinut suliassanngortippaa, taakkuli suli aserorterisimasunik tigusaqarsimanatilluunniit killisiuisimanngillat.
Tusass´ip atortuutaanik aserorterisoqartarnera qaqutigoortuuvoq.
- Ukiut ingerlanerini innuttaasunut paasissutissiissutigiuartarparput, inuiaqatigiinni TV-kkut isiginnaartoqartassappat, sianerfiginittoqassappat internetsertoqassappalluunniit qanoq tamakku paarilluarneqarnissaat pingaartigisoq, Tusass´imi pilersaarusiornermut pisortaq ammalortorsuaq arsatut isikkulik satellitsit atortuinik imalik pilllugu Bjørn F. Sigurdsson oqarpoq.
- Iluatitseqaagulli iluaniittut qajassuutassaatigisut ajortumeerneqarsimanngimmata, taamaattumillu atuisugut tamatuminnga malugisaqanngillat, kisianni aserorsimassagaluarpata ajorluinnartumik pisoqarsimassagaluarpoq, taanna erseqqissaavoq.
