- Naa tupanngilanga. Tassa eqqarsaatigiinnartarsimavara arlaanni immaqa tamakku allanngortitserinissaa aamma, Jonas Tobiassen oqarpoq.Assi: KNR / Johannes Bruun Madsen

Tusass assigiinngitsumik isumaqarfigineqartoq: Aqqatut atorneqarsinnaava?

Tele-Post taaguutaa Tusassinngorpoq. Tamanna inunnit assigiinngitsunik isummerfigineqarpoq. Kalaallit ateqalernera torragineqarpoq, allalli naalisaataanera eqqarsarnartoqartippaa.

Tele-Post Tele-postimik ateqarunnaarpoq. Suliffeqarfiummi aqqa Tusassinngorpoq.

Taanna siornatigut ilisimareerparput. Taannami suliffeqarfiup oqarasuaatinut angallattakanut internetsimullu tunngatillugu nioqqutissaanut amerlasuunut taaguutaareerpoq. Taannalu oqaluussinissamut tunngatillugu ukiut 20-t matuma siornali atugaalereernikuulluni.

Suliffeqarfillu maanna taama ateqalerpoq. Tusass kalaallisut oqaatsip "Tusassaagut" naalisaatigaa, tamannali uterfigeqqissavarput.

Nuummi tallimanngorneq ullup qeqqalerpoq, Kristian Josefsenilu Tusassimut iseriartorpoq.

Taassuma taaguut sungiunniaqqaalaassavaa.

 

 

- Kristian Josefsen, sumukalerpit, KNR-imit ilanngutassiortoq aperivoq.

- Tele-Post-iunngikkuni aah Tusassi, Kristian Josefsen oqarpoq.

Taassuma nutaamik ateqalernera eqqumiigilaarpaa.

- Eqqarsarnarilaaqaara soorlu atitut atorneqarsinnaanngitsoq Tusass taanna taaguut. Tusass uanga ilikkarpara mobiilinninngaanniik oqaluussiniaraangama akiliillunga tusass taanna pisiara.

- Maannakkut tusassisinialerpunga 50 kr.-imut, Kristian Josefsen oqarpoq, ingerlallunilu.

KNR-ip inuit Tusass-ip kiffartuussivianut iseriartortut iseriartortut allat aamma naapippai. Inuillu suliffeqarfiup aqqata allanngornera assigiinngitsumik isummerfigaat.

Jonas Tobiassenip ateq nuannarilluinnarpaa:

 

 

- Torragersuataarpara uanga, tassa nunatsinnut Kalaallit Nunaannut tunngasoq ilisarnartoq, taajuminartoq, allanneq naattoq ja taannartaa torrangersuataarpara, Jonas Tobiassen oqarpoq.

- Naa tupanngilanga. Tassa eqqarsaatigiinnartarsimavara arlaanni immaqa tamakku allanngortitserinissaa aamma Tele.

Asiarpak Frederiksen Lundip Tele-postip aqqata allanngornera sianinngikkaluarpaa. Taassumali Tusassip kiffartuussiviata saaniilluni allagartarsuaq takugamiuk tupaallappoq.

Taassumami oqaatsip "Tusassaagut" naalisarneqarnera eqqarsartoqartippaa

 

 

- Eqqimiitigilaarpara uanga isumaqarama oqaatsivut pingaartinneqarnerulaartariaqartut, naluara ingattarsilaarnerlunga, Asiarpak Frederiksen Lund oqarpoq.

- Tassami naalisagannguasaagami ilaa? Tusass qanoq tusassuugut immaqaluunniit sunaasissaasimassagaluarnerpoq.

Julie Jeremiassenip aqqa aamma eqqarsarnartoqartippaa.

 

 

- Aatsaannguaq eqqartutallakkatsigu naannginnera oqaatsip soorlu tusassaagut immaqaluunniit sumut naalisagaanersoq, taanna oqarpoq, nangillunilu:

- Kisianni isumaqarfiginerpaanngilara atiinnaariarmat.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat