Tusarniaasoqarsimavoq

Saattuarniarnerup ukioq manna juulip aallaqqaataanit unitsikkallarneqarnissaannik naalakkersuisut aalajangernerat, KNAPK-p atorunnaarseqquaa, tusarniarneqaqqaarsimannginnertik pissutaatillugu.

Akerlianik Emanuel Rosing, aalisarnermut pisortaqarfimmi immikkoortortami pisortaq, oqarpoq KNAPK tamanna pillugu tusarniarneqarsimasoq:

Saattuarniarneq ukioq manna juulip aallaqqaataanit septembarip qeqqata tungaanut matoqqatinneqassaaq. Biologit innersuussutaat malillugit tamanna aalajangerneqarpoq, kiisalu upernaaq manna Pinngortitaleriffimmi aalisartut allallu attuumassasusillit isumasiortinneqarmata.

KNAPK-lli tungaaninngaanniit oqartoqarpoq tusarniaasoqaqqaarsimanngitsoq. Akerlianilli aalisarnermut pisortaqarfimmi immikkoortortami pisortaq Emanuel Rosing oqarpoq tusarniaasoqarsimasoq.

- Tassa taannarpiaq siunertaralugu upernaaq manna isumasiortitsisimavugut. Tassani aalisarnermi susassaqartut peqataapput, ilaatigut tunisassiortut allallu, ullunilu marlunni isumasiorneq ingerlanneqareermat, siunnersuutigineqartut saqqummiussorneqarput.

Saattuanik pisassiissutit biologit innersuussinerisa saniatigut aalisarnermut siunnersuisut suleqatigilluinnarlugit pisassiisoqartarpoq, aalisarnermillu unitsitsigallarnissamik naalakkersuisunut innersuussisoqartarluni.

Siorna tamanna iluatsinngitsoorsimavoq, ukioq mannali iluatsissimalluni.